Me vendim të Këshillit të ministrave, qeveria shkarkoi të mërkurën Enton Duron nga posti i drejtorit të Përgjithshëm i Tatimeve. Këtë të premte, në një deklaratë nga Kryesia e Kuvendit, deputeti Lefter Maliqi foli për këtë temë. Ai tha se shkarkimi erdhi për shkak të mos përmbushjes së detyrimeve dhe paketave fiskale.
“Edhe shkarkimi i drejtorit të Tatimeve nuk është asgjë tjetër veçse shembull i mos përmbushjes së detyrimeve dhe paketave fiskale. E hoqën, sepse nuk u arrit asnjë objektiv në drejtorinë e tatimeve dhe taksat dhe varfëria vetëm sa shtohen”, tha Maliqi.
Në VKM e lirimit nga detyra të Duros, thuhet se propozimi u bë nga ministrja e Financave dhe Ekonomisë.
“Në mbështetje të nenit 100 të Kushtetutës dhe pikës 2, të nenit 17, të ligjit nr.9920, datë 19.5.2009, ‘Për procedurat tatimore në Republikën e Shqipërisë’, të ndryshuar, me propozimin e ministrit të Financave dhe Ekonomisë, Këshilli i Ministrave vendosi: Zoti Enton Duro, drejtor i Përgjithshëm i Tatimeve, shkarkohet nga kjo detyrë. Ngarkohen Ministria e Financave dhe Ekonomisë dhe Drejtoria e Përgjithshme e Tatimeve për zbatimin e këtij vendimi.Ky vendim hyn në fuqi menjëherë”, thuhet në vendim.
Enton Duro e mori detyrën e kreut të Tatimeve në Mars 2019, duke zëvendësuar në këtë post Vasilika Vjeron.
