Një aksident i rëndë është regjistruar pasditen e kësaj të mërkure në Manisa të Turqisë.
Një furgon është përplasur me një autobus duke shkaktuar të paktën 6 të vdekur dhe 8 të plagosur.
Agjencia e lajmeve “DHA” raporton se aksidenti i rëndë ndodhi rreth orës 18:30, në afërsi të distriktit Salihli.
Sipas zyrës së guvernatorit të Manisas, aksidenti është shkaktuar nga një gabim i shoferit të furgonit, i cili pas humbjes së kontrollit të mjetit doli në krahun tjetër të rrugës duke u përplasur me autobusin.
“Si pasojë kanë humbur jetën 6 persona që po udhëtonin me furgon dhe janë plagosur 8 prej pasagjerëve të autobusit”, tha zyra e guvernatorit. Në aksident u përfshi edhe një autoveturë, e cila vinte nga pas furgonit, por fatmirësisht asnjë prej udhëtarëve në veturë nuk pësoi dëmtime.
Në vendngjarje mbërritën menjëherë ambulanca të shumta, të cilat transportuan të plagosurit në spital. Autoritetet kanë nisur hetimet për zbardhjen e plotë të aksidentit.
