Zbardhet vrasja e ndodhur një ditë më parë në Korçë. Burime zyrtare nga policia bënë me dije se autori i vrasjes së Gramoz Nakos dyshohet se është kunati i tij Sefedin Zenellari, 71-vjeç.
Ky i fundit i vetëvra mëngjesin e sotëm teksa efektivë të policisë shkuan për ta shoqëruar në banesë.
Vrasja
Nako u gjet i pajetë nga bashkëshortja e tij në banesë, e cila më pas lajmëroi policinë. “Në lagjen nr 7, në banesë është gjetur nga bashkëshortja, shtetasi Gramoz Nako 57 vjeç, i pajetë, i vrarë me armë zjarri në rrethana ende të paqarta”, njoftoi Policia.
Çifti, që raportohet se jetonin në SHBA, kishte pak ditë që ishte kthyer në Shqipëri.
Vetëvrasja e kunatit
Pas krimit, grupi hetimor nisi hetimet dhe indicet i çuan të kunati i viktimës si i dyshuar për ngjarjen. Mëngjesin e sotëm, një grup efektivesh shkuan në banesën e tij për ta shoqëruar. Por, në këto momente, Sefedin Zenellari është mbyllur në dhomë dhe ka vrarë veten me pistoletë. I moshuari jetonte i vetëm në banesën e tij.
Mbetet ende mister shkaku i vrasjes së kunatit nga Sefedin Zenellari.
/Boldnews.al/
