Partizani vjen në përballjen e parë me Karabakun me tetë përforcime nga merkato e verës. Por, jo të gjithdhe ë kanë qenë të gatshëm për trajnerin Lerda, madje dy prej tyre, Brajan Braun Arsitoteles Romero, kanë mbërritur dje në kryeqytet. Nga këto 8 afrime, vetëm Esin Hakaj dhe Uilliam Melo e kanë kryer të plotë fazën përgatitore me ekipin në Slloveni.
Mbase për këtë shkak këta të dy janë të vetmit nga blerjet që mund t’u besohet nga minuta e parë në ndeshjen me Karabakun. Trajneri Lerda ka provuar disa skema dhe rreshtime në seancat e fundit, por, me sa duket, besimin në sulm e ka treshja që kontribuoi edhe në sezonin e fundit me trajnerin Gega.
Kjo gjë u pa edhe gjatë seancës së djeshme, ku italiani i mëshoi punës me të njëjtët lojtarë që i pati titulluar edhe të dielën. Pra, porta mbetet në duart e kapitenit Alban Hoxha, më pas vijon katërshja e mbrojtjes me Ibrahimin, Belicën, Bitrin dhe Hakajn, i cili është preferuar para Trashit. Treshja e mesfushës mendohet të jetë Mala, Telushi dhe Melo. Për momentin, Çinari shikohet si pykë, ndërsa Asani dhe Mensah nga krahët.
