Ardit Hila në “orbitën” e Kukësit. Lojtari i larguar nga Partizani shihet si një opsion për mesfushën e verilindorëve. Nga burime të sigurta pranë palëve, gazeta mëson se klubi është i interesuar për shërbimet e tij dhe se pritet që të nisin edhe bisedimet.
“Panorama Sport” pyeti zyrtarisht edhe klubin, por as e pohuan dhe as e mohuan interesin për 26-vjeçarin. Tashmë mbetet për t’u parë se si do të shkojë ky operacion, ndonëse nënkampionët e vendit kanë domosdoshmëri për një shkatërrues.
BOSHNJAKU – Që pas largimit të Arturo Rexhinaldos, Kukësi nuk e ka gjetur zëvendësuesin. Të shumtë kanë qenë emrat e lakuar gjatë kësaj periudhe, por tashmë janë të detyruar që kundër Debrecenit t’i bëjnë llogaritë vetëm me Vasil Shkurtajn. E megjithatë, kjo nuk do të thotë që klubi është dorëzuar.
Edhe pse deri më tani nuk ka mundur dot të bindin asnjë nga ata që kanë dashur (për shkak të pretendimeve të larta financiare), tratativat vijojnë. Në krye të listës së dëshirave mbetet Petar Kuniç dhe lajmi i mirë vjen pikërisht nga Greqia, pasi sulmuesi boshnjak më në fund ka kontratën me Larisën.
Me rrugën e hapur, tashmë drejtuesve u krijohet mundësia që ta bindin. Por nënkampionët e Shqipërisë do ta afrojnë vetëm nëse 25-vjeçari pranon që të ulë çmimin. Kukësi ofron deri në 6 mijë euro në muaj, ndërsa serboboshnjaku kërkon 10 mijë euro në muaj.
