Ndërtimi i HEC-ve dhe Hidrocentraleve në lumejtë e vendit, mbështetur nga qeveria, e cila ka pajisur me leje shfrytëzimi firmat përkatëse, ka nxjerrë në protestë sot në Tiranë përfaqësues të Shoqërisë Civile.
Protestuesit mbanin në duar pankarta ku bëhej thirrje kundër ndertimit te HEC-eve, si “uji është jetë mos na e merrni”, apo “Ndal HEC-et në Valbonë”. Protestuesit u shprehën se me ndërtimin e këtyre HEC-eve, shumë njerëz rrezikojnë të humbasin shtëpitë e tyre, tokat bujqësore e ujin e pijshëm. Protesta të ngjashme janë parashikuar të organizohen në të gjithë Ballkanin deri më 16 korrik.
“Askush nuk na ka pyetur për mendimin tonë, nuk do të lejojmë ndërtimin e HEC-eve në vendin tonë”, shprehet një prej protestuesve.
“Kemi bërë protesta në fshatra, dhe askush nuk na ka dëgjuar, ne ju themi mjaft këtyre lubive, që kërkojnë të na thajnë lumenjtë dhe të na lënë pa jetë”, shprehet një tjetër prej protestuesve.
Ata thonë se ndaj natyrës po kryhet një genocid i pallogaritshëm, pasojat e të cilit do t’i vuajnë për shumë vite brezat e ardhshëm.
