E drejta e njerëzve të rrëzojnë një qeveri që kthehet në shkatërruese/ Ja kë citon Basha…

Kreu demokrat Lulzim Basha duke cituar Deklaratën e Pavarësisë së SHBA ka bërë thirrje për rrëzimin e qeverisë, e cila është kthyer si shkatërruese.

Në kulmin e krizës politike në vend, duket se Basha ka shfrytëzuar pikërisht festën e Pavarësisë së SHBA, për të cituar Deklaratën e 243 viteve më parë, në të cilën thuhet “dhe sa herë që cilado mënyrë e qeverisjes, kthehet në shkatërruese ndaj këtyre qëllimeve,
është e Drejta e njerëzve, ta ndryshojnë ose rrëzojnë një qeveri të tillë, dhe të themelojnë një qeverisje te re, bazuar mbi ato parime dhe me ato pushtete, që sipas njerëzve garantojnë më së miri, Sigurinë dhe Lumturinë e tyre!”

Mesazhi i Bashës

Të dashur miq,
Këtë 4 korrik dua ta nis me më të famshmin citim nga Deklarata e Pavarësisë së Shteteve të Bashkuara të Amerikës:

Ne i konsiderojmë të mirëqena këto të vërteta:
Se të gjithë njerëzit janë krijuar të barabartë, 
Se ata janë të pajisur nga Krijuesi i tyre me disa të drejta të patjetërsueshme,
Mes të cilave janë Jeta, Liria dhe Ndjekja e Lumturisë.
Se për të siguruar këto të drejta, njerëzit krijojnë qeveri,
Pushteti i drejtë i të cilës buron prej pëlqimit nga të qeverisurit,
Dhe sa herë që cilado mënyrë e qeverisjes,
Kthehet në shkatërruese ndaj këtyre qëllimeve,
Është e Drejta e njerëzve,
Ta ndryshojnë ose rrëzojnë një qeveri të tillë,
Dhe të themelojnë një qeverisje te re,
Bazuar mbi ato parime dhe me ato pushtete,
Që sipas njerëzve garantojnë më së miri, Sigurinë dhe Lumturinë e tyre!