Kreu demokrat Lulzim Basha ka thirrur mbledhje të strukturave drejtuese të Partisë Demokratike, ndërkohë që një ditë më parë paralajmëroi zhvillimin e një proteste kombëtare kundër Edi Ramës.
Protesta do të mbahet para godinës së Kryeministrisë me thirrjet Rama ik, dhe ajo është e para pas votimeve të 30 qershorit dhe e 10 që nga momenti kur opozita nisi aksionin opozitar.
Kjo protestë do të nisë në orën 20:00 të datës 8 korrik, dhe nuk dihet nëse do të jetë e ngjashme me protestat e deritanishme të opozitës apo do të ketë një tjetër organizim.
Duket se kjo është arsyeja që Basha sot në orën 10:00 do të mbledhë Kryesinë dhe ish-deputetët e PD-së, dhe më pas do të ketë një mbledhje të Këshillit Kombëtar.
Burime nga opozita bëjnë të ditur se mbledhjet synojnë përcaktimin e një agjende që do të ndiqet nga partia më e madhe opozitare, por edhe strategjinë që ajo do të aplikojë në plotësimin e kërkesës për largimin e Edi Ramës, krijimin e një qeverie tranzitore dhe zgjedhjet e parakohshme parlamentare.
