Merkato e transferimeve këtë vit po ndërthur shpesh emrat e lojtarëve të Kombëtares me ekipet e kampionatit shqiptar. Në fillim një foto e Migjen Bashës me lojtarët e Partizanit në grumbullim nisi aludimet. Ylber Ramadani dhe Bekim Balaj u lakuan shumë te Partizani, madje u bë thuajse e mbyllur, por asgjë nuk u finalizua.
Me kalimin e ditëve, Azdren Llullaku u bë temë diskutimi në lajmet e merkatos, madje klubi i Kukësit pret akoma përgjigje nga lojtari. Mavraj, gjithashtu një dëshirë e nënkampionëve, por më pas vijoi karrierën në Bundesligën dy. Të tjerë? Lista e kuqezinjve që kanë interesime në Shqipëri vijon. I radhës është një nga lajmet që mund të futet edhe te “tradhtitë e mëdha”. “Panorama Sport” ka mësuar nga burime të besueshme se Partizani ka në listën e dëshirave Andi Lilën. Madje, thuhet se drejtuesit e merktos së “demave” ia kanë bërë ofertën e tyre, Lilës, i cili do të ishte një alternativë për linjën e djathtë (mbrojtës dhe mesfushor), por mund të luajë edhe para mbrojtjes.
Gjithsesi, vetë lojtari e ka lënë të hapur rikthimin në Superiore, por së pari do të dëgjojë dhe bisedojë ofertën e Tiranës dhe në fund do të vendosë si profesionist. Ka zëra se derbit të kryeqytetit për Andi Lilën i është shtuar edhe Kukësi, ndonëse të kuqtë janë gati të ofrojnë një shumë rekord për Superioren.
MERKATO
Mbrojtësit dhe mesfushorit të Kombëtares i ka përfunduar kontrata me PAS Janinën dhe është një nga dëshirat e mëdha të bardhebluve në merkato. Mirëpo, së fundmi mësohet se të kuqtë kanë në plane shërbimet e futbollistit 33-vjeçar. Ndërtimi i një skuadre konkurruese në Kupat e Europës, ku edhe në rast dështimi në Champions, rrugëtimi vijon në Europa Ligë, bën që të kuqtë të mos kursehen në oferta. Gazeta ka tentuar të kontaktoje me vetë futbollistin për të mësuar nëse ka bisedime dhe ofertë zyrtare, por nuk ka marrë përgjigje.
