Lionel Messi ka akuzuar gjyqtarët se kanë favorizuar Brazilin, pasi Argjentina u rrëzua në gjysmëfinale të “Copa America” me humbjen 2-0 në Belo Horizonte. Ylli i Barcelonës, përsëri nuk arriti të kishte ndikim vendimtar në kombëtaren e tij. Golat e Gabriel Jesus dhe Roberto Firmino dërguan Selecao në finalen e këtij kompeticioni, kundër Kilit ose Perusë.
Megjithatë, Messi ishte i ashpër me gjyqtarët e VAR dhe kryesorin Roddy Zambrano. Duke folur në një intervistë pas ndeshjes, pesë herë fituesi i “Topit të Artë” ka kritikuar vendimin e “bluzave të zeza” për të mos i dhënë një penallti Sergi Aguero, para golit të minutës së 71-të, shënuar nga Firmino.
“Brazili nuk ishte më mirë se ne. Ata gjetën golin në fillim të lojës, ndërsa goli i dytë erdhi nga një penallti ndaj Aguero, që gjyqtarët nuk e dhanë, – iu tha Messi gazetarëve. – Gjyqtarët në fushë nuk panë gjë, por as ata të VAR-it nuk e kontrolluan rastin. Kjo është e pabesueshme.
Gjykimi favorizoi vendësit dhe kjo ndodhi gjatë gjithë ndeshjes. Sapo shikonin kontaktin e parë, gjyqtarët vendosnin në favorin e tyre. Ky lloj i tmerrshëm gjykimi na largoi nga loja jonë.
Nuk ka justifikime për ne, por duhet ta rishikojmë këtë turne, ta analizojmë atë dhe të shpresojmë që në CONMEBOL të bëjmë diçka më mirë. Mendoj se luajtëm një lojë të mrekullueshme. Ne bëmë përpjekje të mëdha. Brazili nuk ishte superior ndaj nesh”.
