Lautaro Martinez ndryshoi thuajse gjithçka në karrierën e tij në pak muaj. Nga një lojtar kryesisht stoli tek Interi mori në duar rolin e udhëheqësit të sulmit pas problemeve të Icardit dhe tashmë është kthyer në një element të rëndësishëm edhe tek Argjentina.
Goli i tij ndaj Venezuelës ishte një tjetër dëshmi e cilësive të 21-vjeçarit që për më shumë i shërbeu albiçelesteve për të shkuar në gjysmëfinalet e Copa Americas.
Paraqitjet e Martinez nuk kanë kaluar pa vëmendje dhe një “bombë” merkatoje është lajmi që vjen nga Spanja, më konkretisht nga “Radio la Red”.
Barcelona është gati të lëvizë për të drejtat e kartonit të sulmuesit, dhe jo thjeshte të nisë bisedimet, por është e disponueshme edhe të paguajë klauzolën prej 112 milionë eurosh që argjentinasi ka në kontratën e tij me Interin.
Për momentin duket e vështirë që drejtuesit zikaltër dhe trajneri Antonio Conte të privohen nga Lautaro duke qenë se tekniku e konsideron si element shumë të rëndësishëm të projektit të tij, gjithsesi nëse Barça vërtetë vendos të paguaj klauzolën, atëherë vështirë që Martinez të refuzojë mundësinë për të luajtur me Lionel Messin në të njëjtin klub.
