Kapet në Itali Etjen Çani, autori i dyshuar i vrasjes kryer në bashkëpunim, të dy shtetasve babë e bir, ndodhur në vitin 2012 në Elbasan.
“Gjatë paradites së sotme, si rezultat i bashkëpunimit të Task-Forcës Speciale, në Departamentin e Policisë Kriminale, DVP Elbasan, Interpol Tiranës me Zyrën Ndërlidhëse të Oficerëve Italianë në vendin tonë dhe me Interpol Romën, u bë i mundur arrestimi në Rimini të Italisë, i shtetasit shqiptar në kërkim ndërkombëtar E.C., 28 vjeç, banues në Elbasan”, njoftoi Policia.
“Ky shtetas ishte shpallur në kërkim ndërkombëtar pasi Gjykata e Rrethit Gjyqësor Elbasan, me vendim penal nr. 480, datë 12.06.2019, ka vendosur masën e sigurisë ‘Arrest në burg’ për veprat penale “Vrasja në rrethana të tjera cilësuese dhe ‘Mbajtja pa leje e armëve të zjarrit dhe municioneve luftarake’, në lidhje me vrasjen e shtetasit Gentjan Beqiri B., (alias A. M.,) dhe të babait të tij shtetasit B., ngjarje e ndodhur më datë 15.08.2012 në lagjen ‘Çlirimi’ Elbasan”, shtuan të njëjtat burime.
Burime zyrtare bënë me dije se, task – Forca Speciale kishte marrë informacione në rrugë operative, se ky shtetas fshihej në Itali dhe falë shkëmbimit në kohë reale të informacionit mes Interpol Tirana dhe Interpol Romës, si dhe Zyrës Ndërlidhëse të Oficerëve Italianë në vendin tonë, paraditen e sotme u bë e mundur kapja e tij, me qëllim ekstradimin drejt vendit tonë.
Policia njoftoi se arrestimi vjen në kuadër të aksionit policor “Krasta”, që më 14 qershor çoi në arrestuan dhe ndalimin e 10 persona, si dhe u shpallen në kërkim 5 shtetas të tjerë, ndër ta edhe shtetasi i kapur sot në Itali.
