Në orën 07:00 ka nisur procesi i votimit në vend, ndërsa në komisione janë vetëm përfaqësues të PS-së.
Sot votohet për kryebashkiakët e rinj, në një proces që konsiderohet i paligjshëm për shkak se data e sotme është anulluar nga Presidenti, Ilir Meta.
Zgjedhjet lokale zhvillohen në 61 bashki për këshillin dhe kryetarët në mbarë vendin, ndërsa mungon gara, pasi opozita nuk merr pjesë në këto votime.
Hapja e qendrave të votimit nuk ka shënuar incidente.
Në të gjithë vendin funksionojnë 5417 Qendra votimi, ndërkohë që mbrëmjen e djeshme KQZ njoftoi se, sipas Kodit Zgjedhor u shpërndanë materialet zgjedhore në 90 KZAZ.
Të drejtën për të shkuar te kutia e votimit e kanë 3.464.328 qytetarë shqiptarë. Ata do të vendosin shenjën e tyre në dy fletë votimi: për të zgjedhur kryetarët e 61 bashkive, si dhe parlamentet lokale, pra këshillat bashkiakë.
Në zgjedhje marrin pjesë gjithsej 36 parti. Ato janë të ndara në dy koalicione: Aleanca për Shqipërinë Evropiane drejtuar nga PS dhe që përmban dhe 19 parti të tjera, Koalicioni Shpresa për Ndryshim me 6 parti, e udhëhequr nga Aleanca Kuq e Zi, ndërsa 9 parti garojnë jashtë koalicioneve.
Prej orës 07:00 deri në orën 19.00 qendrat e votimit do të qëndrojnë të hapura. Në terren janë 7779 punonjës të policisë, nga të cilët 5876 punonjës do të angazhohen me shërbim për ruajtjen e objekteve dhe 1450 punonjës policie do të jenë në funksion dhe gatishmëri të procesit zgjedhor.
