Aktori Neritan Liçaj ka kujtuar me humor herën e parë kur ai ka votuar në jetën e tij, në vitet e diktaturës, në 1987.
Në një studio televizive, Liçaj, pasi ka parë sesi qytetarët po talleshin sot para qendrave të votimit me këngë dhe me thirrje “Parti – Enver, jemi gati kurdoherë”, i erdhi ndër mend historia e tij:
“Republikë çitjanesh! Këto janë forma shumë inteligjente proteste, i përgëzoj qytetarët, – tha Liçaj. – Ishte kryevepër që ishin veshur si në atë kohë.
Unë kam votuar për herë të parë në 1987. Kështu zhvilloheshin votimet. Dilnin që në 6 të mëngjesit me orkestra ose me qendër zëri, me këngë popullore, sikur populli po shkonte me hare. Kishte edhe këngë patriotike.
Ka qenë identik kështu, vetëm se veshjet janë të ndryshme. “Fshati në festë”, kështu ka qënë atmosfera! Mbaronin zgjedhjet në të gjithë Shqipërinë për çerek ore! Hapeshin qendrat e votmit në orën 6 dhe në 6 e çerek duhet të kishte votuar i gjithë populli.
Herën time të parë unë vajta një çikë me vonesë, në orën 7. Një nga ata pensionistët e Frontit Demokratik të lagjes, më tha: “Pse me vonesë, djalëëë?!”
I thashë unë: “Më fal xhaxhi, po unë kam qenë deri në 2-3 të mëngjesit në prova!” se isha në shkollë. “Kam qënë në punë, nuk pata mundësi.”
Dhe e bukura ishte se kush votonte atëherë si unë për herë të parë, duhet ta deklaronte votën! Po vetëm një emër kishte aty, vetëm Fronti, s’kshte nevojë të shkoje tek dhoma e fshehtë. Mirëpo, ne që votonim për herë të parë duhej ta deklaronim: Votën time ia jap Frontit Demokratik!
Është si sot, që voton për partinë. Thjesht duhej të fusje letrën aty brenda, pastaj se kë fuste ai në Kuvend, e dinte ai. Po të paktën fuste figura të respektuara, që kishin një staturë, kurse tani ke çudira, ke Gjuzër me shokë…” ironizoi aktori.
Po tallet gjithë Shqipëria me këtë proces, që nuk të bën më as për të qeshur, – theksoi Liçaj. – Por unë sot shoh zgjidhjen e problemeve të Shqipërisë, si do të vijojë. Unë nuk jam analist, por qytetar dhe njeri i angazhuar që e do të ardhmen e këtij vendi dhe unë e shoh këtë si zgjidhjen e problemit.
Çfarë mendoni ju, se ata që zgjidhen sot do të kenë mandat katërvjeçar?! Unë nuk mendoj kurrë se do të kenë mandat katërvjeçar. Do ta lërë njeri Ramën, nga shqiptarët deru tek ndërkombëtarët, të instalojë diktaturën?! Nuk ka shanse!”
