Kryetari i Partisë Demokratike në një dalje të jashtëzakonshme, vetëm pak orë para nisjes së votimeve të dielën në të gjithë vendin, u bëri thirrje të gjithë demokratëve dhe mbështetësve të opozitës, të dalin në rrugë , të protestojnë paqësisht dhe të distancohen nga dhuna.
Basha tha se Rama kërkon që të qëndrojë në pushtet duke shtyrë mbështetësit e opozitës drejt dhunës. Më tej ai tha se një gjë të tillë nuk duhet t’ia lejojmë.
“Nesër nuk ka zgjedhje. Zgjedhjet janë shprehje e vullnetit të lirë të zgjedhjeve.
Unë di që shumë nga ju kanë dashur që nesër të mos kishte votime farsë, por e vetmja mënyrë për të arritur këtë ishte dhuna. Por ajo do të linte plagë të hapura dhe probleme të pazgjidhura.
Unë dhe çdo demokrat nuk besojmë te dhuna.
Jeni krenar se i kemi bërë një shërbim të madh shqipërisë duke mos besuar te dhuna.
Ky regjim është plagosur për vdekje dhe do të rrëzohet shumë shpejt”, tha Basha
Duke iu referuar situatës ai u bëri një thirrje të fortë mbështetësve.
“Nga dhuna nesër nuk përfiton askush përveç Edi Ramës. Ai do aresye dhe kërkon të sigurojë pretekstin e kundërshtarit të humbur. Rrëzimi i Edi Ramës nuk do të vij duke përplasur shqiptarët me njëri-tjetrin. Fundi i Ramës po vjen nga braktijsa e tij, nga distancimi, nga izolimi i tij.
Ai është i gatshëm t’i çojë njerëzish në vëllavrasje. Mos bini pre e instiktit të dhunës, mos bini pre e provokimeve për dhunë. Unë u bëj thirrje, mos shkoni të votoni”.
Ngrijeni zërin nesër në protesta , në rrugë e kudo. Nesër me bashkim e qëndresë dinjitoze më bashkim e kuroja e jo me dhunë”, tha Basha.
Deklarata e plotë
Nesër në Shqipëri nuk ka zgjedhje. Zgjedhjet janë mekanizmi se si njerëzit vendosin për qeverisjen që duan, por nesër njerëzit nuk kanë asnjë zgjedhje. Zgjedhjet janë shprehje e vullnetit të lirë të njerëzve. por nesër nuk do të ketë liri dhe nuk do të ketë shprehje vullneti.
Zgjedhjet janë mekanizëm kushtetues dhe ligjor, por nesër do të shkelet Kushtetuta dhe ligji në një proces antikushtetues dhe thellësisht kriminal.
Të dashur bashkëqytetarë:
Unë e di që shumë prej jush kanë dashur dhe kanë pritur që nesër të mos kishte as votime farsë, të mos kishte asgjë. Por e vetmja mënyrë për ta arritur këtë, o të ishte mënyra e dhunshme, e cila do të shkaktonte vëllavrasje dhe humbje njerëzore e plagë shoqërore.
Dhuna nuk do të prodhonte as përfitime politike. Ajo thjesht do të sillte një ndjenjë të rremë të triumfit të çastit dhe do të linte plagë të hapura e probleme të pazgjidhura,
Unë dhe demokratët nuk besojmë tek rruga e dhunës!
Ndaj sot dua t’i them cdo demokrati dhe qytetari që është bashkuar në përpjekjet tona: Jini të gjithë krenarë, sepse i kemi bërë një shërbim të madh Shqipërisë duke mos rënë pre e dhunës së orkestruar nga Edi Rama!
Unë jam krenar me dinjitetin, qytetarinë dhe kurajon tuaj!
Falë tyre, ky regjim është plagosur për vdekje dhe do të rrëzohet shumë shpejt.
Unë e di, se ka shumë njerëz që mendojnë se me autokratë si Edi Rama, Dhuna është i vetmi mjet për ta hequr, se Edi Rama nuk kupton asnjë gjuhë tjetër, veç asaj të dhunës.
Këtë opinion ma kanë shprehur shumë anëtarë dhe mbështetës të Partisë Demokratike. Ma kanë shprehur shumë qytetarë, analistë politikë e të tjerë, por unë nuk besoj se dhuna është zgjidhja.
Unë besoj se forca jonë qendron tek drejtësia e asaj që kërkojmë, qëndron tek këmbëngulja, durimi dhe kurajo jonë.
Asnjë rezultat politik, asnjë pushtet politik që del nga dhuna, nuk ka sjellë kurrë asgjë të mirë për popujt dhe për qeverisjet e tyre.
Dhuna prodhon ndërrime mekanike të pushtetit, pa bërë asnjë pastrim dhe transformim. Dhuna krijon përligje kriminale tek ata që vinë në pushtet prej saj
Unë besoj se nga dhuna në 30 qershor nuk përfiton askush përveç Edi Ramës.
Basha tregon ku ndryshon nga Rama: Për pushtetin personal, Rama është gati të çojë shqiptarët në vëllavrasje. Unë kam përgjegjësi për jetën e çdo shqiptari
Dhuna dhe viktimat i vlejnë vetëm Edi Ramës. Ai do arsye. Ai kërkon të sigurojë pretekstin e kundërshtarit të dhunshëm për të justifikuar shtetin e tij policor për të justifikuar dhunën dhe abuzimet dhe krimet që ka kryer deri tani.
Rrëzimi i Edi Ramës nuk do të vijë duke përplasur shqiptarët me njëri-tjetrin, nuk mund të vijë duke goditur, duke rrahur apo lënduar njëri-tjetrin.
Fundi i Edi Ramës po vjen nga braktisja e tij.
Nga distancimi prej tij.
Nga izolimi i tij.
Ky fund është pranë dhe, mbi të gjitha, sepse përpjekjet tona të deritanishme kanë qenë thellësisht europiane, thellësisht parimore dhe jo për pushtet personal.
Përgjegjësia dhe detyrimi im kryesor është interesi publik, është mirëqenia e njerëzve. Ky interes vjen mbi çdo interes partiak, vlen para çdo interesi vetjak.
Ndryshe nga Edi Rama që për pushtetin e tij personal është i gatshëm t’i çojë nesër shqiptarët në vëllavrasje, unë kam përgjegjësinë për jetën e çdo demokrati, çdo socialisti, çdo qytetari shqiptar.
Ndaj, për nesër unë kam vetëm një thirrje: Mos bini pre e instinktit të dhunës! Mos bini pre e provokimeve për dhunë!
Basha apel tjetër shqiptarëve: Bojkotini! Rezistoni! Me qëndresë dinjitoze, me vendosmëri dhe jo dhunë!
Unë ju bëj thirrje të mos shkoni të votoni, të bojkotoni!
Nëse jeni të detyruar të shkoni në qendrat e votimit nga hakmarrja e regjimit, rezistoni! Regjimit po i vjen fundi! Nuk kanë çfarë t’ju bëjnë!
Ngrijeni zërin nesër në protesta në rrugë!
Sfidojeni regjimin kudo!
Në mënyrë paqësore!
Nesër është dita për të treguar vullnet me bashkim, me qëndresë dinjitoze, me vendosmëri dhe jo dhunë!
Në këtë ditë të keqe për Shqipërinë, forca jonë janë vlerat që ne tregojmë, parimet mbi të cilat ne veprojmë!
Ne duam të jemi europianë dhe duhet të sillemi si europianë! Nesër dhe çdo ditë!
Nesër duhet dhe do të dallohet qartë diferenca mes autokracisë kriminale të votimeve farsë dhe dinjitetit të një populli të tërë të bashkuar që sfidon regjimin.
