Kandidatja zyrtare e Presidentit Donald Trump për ambasadore të SHBA në Shqipëri, Yuri Kim, akuzohet nga autoritetet turke si e përfshirë në protestat e mëdha që përfshinë Turqinë në vitin 2013.
Një diplomate karriere, Kim ka shërbyer në ambasadën e SHBA në Turqi për tre vjet, në pozicionin e këshilltares politike.
Pas përfundimit të misionit në Ankara, Yuri Kim është emëruar për të mbikqyrur Turqinë, Greqinë dhe Qipron në Byronë e çështjeve evropiane dhe euroaziatike.
Kim është anëtare në stafin e lartë të Shërbimit të Huaj dhe ka shërbyer në Departamentin e Shtetit si Drejtore e Zyrës së Çështjeve të Evropës Jugore. Më herët, ajo ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake.
Ndoshta emërimi nga Presidenti Trump i Yuri Kim në Shqipëri nuk është edhe aq i rastësishëm, po të kihen parasysh lidhjet e forta mes kryeministrit Edi Rama dhe Presidentit turk, Recep Tajip Erdogan.
Dhe siç duket në prioritetin e SHBA në Shqipëri, pikërisht mund të jetë në fokus, ndërprerja e lidhjeve kaq të forta, të cilësuara madje edhe vëllazërore mes Ramës dhe Erdogan.
Shpeshherë Rama është akuzuar brenda dhe jashtë vendit se po qeveris dhe sillet me metodat e Erdogan.
Madje, dy vjet më parë, në votimin e famshëm në OKB për njohjen e Jeruzalemit si kryeqytetin e Izraelit, Shqipëria nën qeverisjen e Edi Ramës mbështeti rezolutën e Turqisë, Egjiptit dhe vendeve arabe, duke kundërshtuar vendimin e Presidentit amerikan Donald Trump.
Akuzat turke
Yuri Kim është përgjuar nga autoritetet turke gjatë protestave të 2013.
“Ka edhe disa biseda telefonike të përgjuara mes të një personi të identifikuar si Yuri në ambasadën e SHBA dhe Osman Kalavas, i cili, sipas aktakuzës, është biznesmeni turk dhe filantropist, i quajtur nga mediat pro-qeveritare si “Soros i Turqisë”.
Ky person duket të jetë Yuri Kim, drejtore aktuale e Zyrës së Departamentit të Shtetit të SHBA-së për Çështjet Evropiane Jugore, e cila në atë kohë ishte duke shërbyer si këshilltare politike në ambasadën e SHBA-së në Ankara.
Në një bisedë telefonike, Yuri sugjeron që Kavala të kërkojë ndonjë gazetar që ai njeh në Uashington për të sjellë protestat, gjatë konferencës për shtyp të Departamentit të Shtetit”, raportojnë mediat turke, pak muaj më parë, referuar aktakuzës së ngritur nga prokurorët turq.
Prokurorët turq akuzuan financierin amerikano-hungarez George Soros se ishte pas protestave të mëdha kundër qeverisë në mbarë vendin që përfshinë Turqinë në vitin 2013.
Sipas aktakuzës, në dosjen prej 657 faqe, thuhet se demonstratat u mbështetën dhe financoheshin nga jashtë. /Boldnews.al/
