Ministrja e Arsimit, Besa Shahini, përmes një urdhërese drejtuar drejtorëve të shkollave u kërkon që të marrin masa lidhur me rastet kur objektet shkollore do të përdoren si qendra votimi në procesin e 30 qershorit.
Në urdhëresë u kërkohet drejtuesve të shkollave që të jenë në dispozicion të Komisioneve të Qendrave të Votimit, KZAZ-ve dhe KQZ-së me qëllim garantimin që ambientet që janë përcaktuar si qendra votimi, të jenë gati për zgjedhjet e 30 qershorit.
Po kështu Drejtorive Arsimore u kërkohet që të jenë në dispozicion të policisë dhe komisioneve të votimit, me qëllim që objektet shkollore që janë përcaktuar si qendra votimi të jenë të hapura në përputhje me ligjin.
Urdhëresa paralajmëron deri në shkarkim nga detyra për të gjithë drejtuesit e shkollave që nuk do të zbatojnë këtë vendim.
