Sekretari për Çështjet ligjore në PD, Çlirim Gjata, e quajti “burokratik” qëndrimin e Zëvendësndihmës Sekretarit Amerikan të Shtetit, Mathew Palmer, i cili njohu 30 qershorin si datë zgjedhjesh.
Gjata tha se nuk mund të bëhen zgjedhje pa standarde. Ai ripërsëriti qëndrimin e shprehur më herët nga kreu i PD-së Basha, se PD nuk hyn në zgjedhje pa largimin e Ramës si kryeministër dhe vënien para drejtësisë të atyre që kanë vjedhur votat.
“Nuk ka zgjedhje në 30 qershor, por po nuk u plotësuan standardet nuk ka as 13 tetor”, u shkreh në emisionin Opinion, ku ishte i ftuar.
Lidhur me 30 qershorin, Gjata deklaroi se “votimet do pengohen në mënyrën më paqësore më normale të ndryshëm”.
“Në zgjedhje nuk shkohet me këto standarde. Ne nuk kishim gjë me datën 30, çështja është te standardet. Nuk ka zgjedhje nëse nuk ka standarde. Nuk shkohet në zgjedhje me Avdylajt, Niçen. Deklarata e Palmer është burokratike, jo qëndrim politik. Si delet në sallahane, opozita nuk shkon në zgjedhje. Nuk ka zgjedhje në 30 qershor, por po nuk u plotësuan standardet nuk ka as 13 tetor. Zgjedhjet e Enver Hoxhës prodhuan Enver Hoxhën, këto po prodhojnë diktaturën e krimit të organizuar”, u shpreh Gjata.
“Ne jemi të gatshëm që hyjmë kur të plotësohen standartet, me Ramën dhe me këtë klikë s’mund të hyet në zgjedhje. Largimi i Ramës dhe vënia para drejtësisë e atyre që kanë vjedhur zgjedhjet s’ka zgjedhje”, deklaroi.
