“Në funksion të farsës zgjedhore dhe të përdhosjes së Kushtetutës, Ministria e Arsimit nxjerr një qarkore, e cila hapur shkel Kodin Zgjedhor dhe Ligjin për Arsimin parauniversitar. Një turp e skandal i paparë e i padëgjuar”. Denoncimi bëhet nga ish-deputeti i PD-së Laçiano Boçi.
Në një status në Facebook, ai shpjegon më tej: “Qarkorja udhëron në pikën 5, dorëzimin e institucioneve arsimore policisë së shtetit, duke ligjëruar dhunimin e shkollave. Policia e shtetit ndalohet sipas Kodit Zgjedhor t’i afrohet QV-ve e jo më t’i posedojë siç i kërkohet. Ky është pushtim policor”.
“Në qarkore, Drejtorët si personel arsimor, në kundërshtim me nenin 88 të Kodit që i ndalon, përfshihen me detyrim në procesin zgjedhor. Ministria sillet si pronare e institucioneve arsimore në kundërshtim me nenin 28 të Ligjit të arsimit parauniversitar, i cili përcakton se është njësia e qeverisjes vendore (Bashkia) ajo që zotëron juridiksionin mbi to. Që garanton paprekshmërinë, ruan e mirëmban institucionin arsimor. Çmenduria e Ramës e të pabesëve të tij nuk paska kufij”, përfundon Boçi.
Presidenti i Republikës njoftoi këtë të enjte dekretin për datën e re të zgjedhjeve lokale: 13 tetor 2019. Ndërsa nga qeveria vijon të këmbëngulet se zgjedhjet do të mbahen më 30 qershor.
