Në zyrat e klubit të Interit kanë zbarkuar edhe sot menaxherë futbollistësh, ndërsa për disa orë qëndroi aty edhe Drejtori Sportiv i Sassuolos, Giovanni Carnevali, me të cilin zikaltrit diskutuan për emrat e Gravilon dhe Sensi.
Ky i fundit është shumë pranë kalimit te Interi, por siç tha Carnevali pas daljes nga zyrat e klubit zikaltër, marrëveshja me gjasë do të mbyllet në ditët e para të muajit korrik, pasi po diskutohen detaje mbi huazimin.
Nga ana tjetër, Sassuolo pëlqen mbrojtësin 21-vjeçar Andrew Gravillon, në pronësi të Interit dhe ka ndërmend të shpenzojë rreth 7 milionë euro, për ta marrë në skuadër këto ditë, në një operacion që do të ndihmojë zikaltrit të përmirësojnë bilancin para 30 qershorit.
E ndërkohë që Sensi është ende në pritje, zikaltrit kanë mbyllur marrëveshjen për transferimin e Lucien Agoume në Milano. Mesfushori 17-vjeçar cilësohet si Paul Pogba i ri dhe ka debutuar këtë sezon me ekipin e parë të Sochaux, në Ligue 2 të Francës.
Zikaltrit mendohet se kanë paguar rreth 7 milionë euro për kartonin e Agoume, ndërsa ky i fundit pritet të mbërrijë nesër në mëngjes në Milano, për të kryer vizitat mjekësore dhe firmosur kontratën me klubin zikaltër.
Sa u përket operacioneve në dalje, Andrea Pinamonti është vetëm një hap transferimit te Genoa. Kjo e fundit do të paguajë 18 milionë euro në arkat e Interit, për sulmuesin e talentuar, ndërsa vetë Pinamonti do të nënshkruajë një kontratë 4-vjeçare me një milionë euro në sezon.
Menaxheri i Pinamontit, Mino Raiola kërkoi një pagë më të lartë për sulmuesin, por në fund dha miratimin për marrëveshjen, ndërsa Interi ka ruajtur të drejtën e riblerjes së futbollistit sezonin e ardhshëm, për shifrën e 25 milionë eurove.
