Enis Gavazaj duket se është rikthyer të bëjë qendrën e merkatos. Jo vetëm në kampin e Skënderbeut, por në tërësi në kampionatin shqiptar. Pas një sezoni në huazim fillimisht tek Enisei dhe më pas në radhët e Dinamos së Minskut, kosovari është sërish në qendër të tratativave për të synuar më pas një aventurë të re në Europë.
Huazimet këtë sezon që u mbyll nuk ishin me vlerë për Gavazajn, i cili nuk arriti dot të tregonte nivelin e lartë të lojës së bërë në Europë me Skënderbeun.
Në kushtet kur ky huazim përfundoi, lojtari është i destinuar të rikthehet në Korçë. Por me mungesën e impenjimeve europiane, klubi bardhekuq është duke menduar një tjetër sistemim për Gavazajn, me qëllim për ta nxjerrë më pas sërish në tregun europian. Gjë që do të kishte shumë vlerë financiare për korçarët.
Në kushte të tilla, duke parë interesimin e Kukësit dhe të Teutës për lojtarin, korçarët janë duke llogaritur se cili do të ishte destinacioni më i mirë për të huazuar sulmuesin anësor. Marrëdhëniet e mira Gjici-Takaj duket se e shtrojnë më shumë rrugën që Gavazaj të përfundojë te verilindorët, ndërsa në anën tjetër te Teuta, sulmuesi do të gjente veç Shkëmbit në pozicionin e trajnerit edhe Tefik Osmanin dhe Renato Arapin dy ish-futbollistë të Skënderbeut.
Gjithsesi, nuk është kjo që po shqetëson korçarët, të cilët janë duke kërkuar ambientin që i shkon më shumë për shtat lojtarit. Me një huazim të tillë, Skënderbeu kërkon të fitojë vëmendjen e ekipeve europiane për lojtarin, në mënyrë që të sigurojë financa në rast të një transferimi të mundshëm.
OTO XHON
Në anën tjetër nuk është vetëm Gavazaj që shqetëson Skënderbeun, por edhe pesë lojtarët që janë pa kontrata dhe Skënderbeu i kërkon t’i ketë sërish pjesë të vetën në sezonin e ri. Duke nisur nga kapiteni Marko Radas e më pas me Gjergji Muzakën dhe Leonit Abazin, e për të vijuar me të rinj si Teqja apo Oto Xhon, të gjithë janë në dilemë për të ardhmen.
Nëse Radas dhe Muzaka, e deri diku Abazi, kanë treguar dashurinë për klubin dhe dëshirën për të qenë sërish pjesë e Skënderbeut, një gjë e tillë mbetet e dyshimtë kur flitet për Oto Xhon. Së pari, lojtari është me pushime dhe nuk dihet se kur do të kthehet, por nga ana tjetër mund të tentojë edhe ndonjë aventurë në ndonjë ekip tjetër ndoshta jo vetëm në Shqipëri.
Por mungesa e garancisë qëndron edhe në faktin se a do të jetë Oto Xhon në planet e trajnerit të ri të Skënderbeut?! Duke parë sezonin e fundit ku nigeriani nuk është se tregoi shumë nga sa priste ekipi, duket disi e vështirë. Çdo ditë që kalon e çon akoma më larg lojtarin nga Korça.
/PANORAMASPORT.AL
