Deputeti Lefter Maliqi shprehet se situata e kërkon që të bëhet edhe një protestë e 10-të kombëtare, me të cilën ti tregohet botës forca e një populli që kërkon ndryshimin.
“Mendoj se duhet të bëhet edhe një protestë e dhjetë që t’i tregohet botës forcën e popullit dhe vendosmërisë që ka ai për ndryshimin”, tha Maliqi në Fax News, gjatë një interviste me gazetarin Rezear Xhaxhiu.
Deputeti sqaroi edhe një detaj për ministrin e Brendshëm Sandër Lleshi për mënyrën se si Policia i menaxhon protestat, madje duke e këshilluar.
“Kam një këshillë për ministrin! E ngatërron Ushtrinë me Policinë, janë dy gjëra të ndryshme zotëri, policia ruan rendin ndërsa ushtri është për çështje të tjera. Kjo është një ngatërresë e madhe që përdor edhe gaz lotsjellës dhe maska”, tha Maliqi.
Deputeti tha se me 30 Qershor do të jetë në zonën e tij elektorale me të majtë e të djathtë.
“Ditën e diel në orën 10 do të jem në zonën time. Me të majtë dhe të djathtë bashkë. Kam afrimitet dhe kam dëgjuar se edhe të majtët nuk janë të kënaqur.
Mos ndodhte 30 Qershori sepse do të jetë ditë e keqe për mazhorancën, dhe ditë e keqe për disa qytetarë që do të përplasen. T’i thërrasë mendjes kalorësi të zbres në tokë dhe të gjejë një rrugë për të shmangur përplasjet”, tha ai.
