Kryeministri Edi Rama do të jetë nesër në Durrës, në një takim ku do të përmbyllë fushatën për kandidaten e tij në këtë qytet, Valbona Sako.
Takimi do të zhvillohet në sheshin “Liria”, në orën 18:30.
Pritet që ashtu si edhe në takimet e deritanishme, kryeministri të shoqërohet nga një numër i madh forcash policie, përfshi edhe efektivët e FNSH-së.
Ndërkohë opozita ka paralajmëruar zhvillimin e protestave në çdo takim të kryeministrit, çka pritet të ndodhë edhe në Durrës.
Burime nga partitë opozitare shprehen se strukturat janë organizuar për t’a pritur Ramën me protesta, ndërkohë që peshën kryesore do e kenë anëtarët e forumeve rinore.
Përgjimet nga dosjet 339, që kanë të bëjnë me manipulimin e votave në këtë qark në zgjedhjet e 2017, pritet të jenë në qendër të vëmendjes opozitare.
Në anën tjetër, masat e sigurisë në qytetin brendetar pritet të jenë të larta dhe policia lokale, e mbështetur nga FNSH do të vendosë një perimetër sigurie për të shmangur afrimin e protestuesve në vendin, ku Rama dhe pjesëmarrësit në këtë takim do të ulen te karriget e kuqe.
I pranishëm, ndoshta edhe në krah të Ramës, pritet të jetë Vangjush Dako, i cili shfaqet në përgjimet e publikuara nga Bild, si një nga protagonistët e manipulimit zgjedhor.
