Deputeti i Partisë Socialiste, Ilir Ndraxhi pasi është marrë në pyetje nga Prokuroria e Krimeve të Rënda, i është rikthyer fushatës.
Pas seancës së pyetjeve në lidhje me dosjen 339, ai ka shkruar sërish në fushatë, ku me anë të një postimi në rrjetet sociale shkruan se ka qenë në Shijak. I pashqetësuar fare nga përgjimet ku dëgjohej zëri i tij Ndraxhi, shton se në vëmendjen e tij janë të gjithë problemet e Shijakut.
“Disa momente ngainspektimet e bëra gjatë ditës së sotme për projektin ‘Rikonstruksioni i rrjetit të ujësjellësit Mulliri i Bullgarit deri tek Ura e Shijakut Bashkia Shijak’. Problematikat e qytetarëve të qytetit tim, Shijakut, kanë qenë dhe do të mbeten në vëmendjen time si deputet përfaqësues i kësaj zone”, shkruan Ndraxhi.
Kujtojmë se zëri dhe emri i Ndraxhit u dëgjuar në përgjimet që publikoi “Bild”, ku eskponentë të lartë të PS flisnin me Avdylajt për pozicione punë dhe për heqje gjobash. Në këto përgjime tregohej bashkëpunimi që Partia Socialiste kishte me Avdylajt pasi këta të fundit premtonin se do arrinin të fitonin shumë vota. Në lidhje me këto përgjime deputeti i Shijakut, Ilir Ndraxhi ka qenë në Prokurorinë e Krimeve të Rënda ku është pyetur për dy orë.
