“Zoti Rama, do të na thoni një datë, se këto 100-ditëshat na duken si premtime elektorale”. Ardjan Takaj e kishte parandjerë dhe i kërkoi kryeministrit Edi Rama që të ishte i drejtpërdrejtë në takimin që ai pati me përfaqësues të klubeve të futbollit dhe FSHF-së. 20 qershori ishte data e premtuar nga kryeministri, por ende nuk ka ndodhur asgjë.
Tryeza “Siguri-Reformim-Modernizim” ka 102 ditë që është mbledhur. Nga atëherë ka pasur edhe takime të FSHF-së me Ministrinë e Financave dhe Ekonomisë. Vetë kreu i federatës, Armand Duka, e ka thënë edhe më parë që kërkesat e tyre nuk do të plotësohen nga qeveria. Takimet e bëra e kanë bindur atë.
FSHF hartoi edhe një draft, duke u konsultuar edhe me klubet. Kërkesat ishin këto: “Formalizimi i klubeve profesioniste, duke bërë 0 tatimin mbi të ardhurat dhe sigurimet shoqërore të tyre për sa paku 5 vite. Tvsh 0 për investimet në sport dhe materialet sportive, terrenet sportive t’u kalojnë klubeve pa shpërblim, për çdo investim në infrastrukturë nga klubet qeveria të kontribuojë me 50 %, disa ndryshime në Ligjin për Sportin, disa ndryshime në Kodin Penal për të mbrojtur atmosferën sportive, hartimin e Ligjit të Sponsorizimit në Sport, ku kompanive 30% e taksave u zbriten për investime në sport”.
/Sport Ekspres