Kryetari i Partisë Demokratike, Lulzim Basha foli për përgjimet e publikuara nga BILD një ditë më parë. Në një deklaratë nga selia blu, Basha tha se Edi Rama ka një “aftësi gjeniale” për të bashkëpunuar me krimin në favor të përfitimeve personale.
“Në Shqipëri janë vjedhur të gjitha zgjedhjet që ka organizuar Edi Rama, ky është konkluzioni që nxjerr i madh e i vogël nga përgjimet e BILD dhe skandalet e tjera të qeverisë”, tha Basha.
“Kanë bashkëpunuar me trafikantë droge, qeniesh njerëzorë, vajzash e grave të shqiptarëve, vrarës, grabitës. Së dyti kjo aleancë krimi rilindjeje ka përdorur çdo mjet dhe mekanizëm për të vjedhur votën. Kanë blere vota me para, kanë kërcënuar, kanë dhunuar dhe penguar nga votimi ata që nuk do votonin me kandidatët e tyre. Kanë ndëshkuar ata që s’janë bindur. Çdo mjet i dhunshëm është përdorur pa asnjë kufizim. Aleanca krim-Rilindje ka përdorur gjithë administratën për vjedhjen e zgjedhjeve, nëpunësit civil, administratën qendrore e lokale, institucionet e varësisë dhe të pavarura, punonjësit e ndërmarrjeve publike e shtetërore. Aleanca Rilindje-krim ka përfshirë gjithë nivelet partiake e shtetërore. Edi Rama mbi të gjitha është timonieri i vjedhjes së zgjedhjeve, çdo gjë është bërë me planifikimin e tij. Nga përvoja e tij e gjatë me bashkëpunim me krimin ka përfituar aftësinë si ta përdorë pushtetin për interes të tij për ta shkrirë në një me krimin, ky është gjenialiteti kriminal i Ramës”, u shpreh ai.
