Disa seli diplomatike, kryesisht të vendeve perëndimore, duket se kanë aktivizuar protokollin e sigurisë për shtetasit e vendeve të tyre që jetojnë, punojnë apo ndodhen në Shqipëri.
Përmes postës elektronike, shtetasve të vendeve të tyre, ambasadat u kanë kërkuar të regjistrohen në sistemin e tyre të emergjencës, ku jepen këshilla mbi sigurinë në rast rreziku.
Ky është një lloj protokolli sigurie që nëse ndodh diçka të gjithë shtetasit e huaj të jenë të lajmëruar në kohë reale.
Protokolli tregon ku të lëvizësh dhe kë të kontaktosh në rast rreziku.
Protokolli i sigurisë është aktivizuar 11 ditë para 30 qershorit, ditë kur Edi Rama po shkon drejt zgjedhjeve, në një kohë që ato janë anulluar me dekret të Presidentit.
Ditën e premte, në orën 20:00 opozita pritet të zhvillojë një protestë kombëtare, e 9 prej 16 shkurtit, me kërkesën e vetme largimin e Edi Ramës.
Më parë, ambasadat kanë kërkuar nga qytetarët e tyre që të shmangin zonat ku ka shumë grumbullime, por nga sot është aktvizuar sistemi i sigurisë.
Nuk dihet nëse ambasadat kanë informacione nga agjensitë e vendeve të tyre për atë që mund të ndodhë në Shqipëri, apo thjesht duke parë situatën elektrizuar dhe përplasjet mes qytetarëve që mbështesin dekretin, pra anullimin e zgjedhjeve, dhe forcave qeveritare të sigurisë, kanë menduar të mbrojnë shtetasit e vendeve të tyre.
Po kështu raportohet se disa nga kompanitë ajrore që operojnë në Shqipëri, kanë porositur pilotët dhe stafin e linjës ajrore, që të mos largohen nga perimetri i sigurisë së aeroportit.
Këto janë masa ekstreme mbi atë që mund të ndodhë, ndërkohë që ka një përshkallëzim të situatës.
