Bllof të madh për të frikësuar njerëzit, e ka cilësuar Edi Rama paralajmërimet për përplasje civile më 30 qershor.
Rama në një takim në Maliq, ku ka prezantuar kandidatin për kryebashkiak të Rilindjes, tha se nuk ka kushte për të bërë një ’97 tjetër në Shqipëri.
“Ku janë njerëzit që kanë humbur kursimet? Ku është revolta e njerëzve? Çfarë po ndodh këtu, deputetët kanë lënë mandatet dhe kanë marrë nga një molotov në dorë.
Ilir Meta anulloi ditën e zgjedhjeve duke thënë se ka informacione se do të bëhet hataja. Ku i ka informacionet, kush ia dha? Apo filxhani? Nuk ka asnjë gjakderdhje, por ka llumëderdhje nga filxhani i fallxhores”, tha Rama.
Ai u shpreh se s’duhet të ketë asnjë merak nga konfliktet, asnjë frikë nga zgjedhjet, ndërsa ftoi qytetarët, që të bëjnë detyrën e tyre për Shqipërinë dhe të marrin pjesë në zgjedhje.
“As demokrati më i thekur s’duhet të bëhet mish për top për ata, që u futën mes turmës, duke gjetur më budallenjtë dhe më të sinqertët dhe i hodhën mish për top, të cilët sot flenë nëpër burgje, ndërsa ata flenë në shtëpitë e tyre”, tha Rama.
Kryeministri theksoi se në këto zgjedhje u ngatërruan punët pak, për shkak të kundërshtarëve tanë.
“Këto zgjedhje janë kthyer në politike, qytetare dhe atdhetare sepse në 30 qershor nuk do të vendoset thjesht se kush do të drejtojnë bashkitë në 4 vitet e ardhshme, por do të vendoset se cila do të jetë Shqipëria e 30 viteve të ardhshme.
Ata kanë synuar dhe synojnë që të ngrihen mbi ligjin duke sharë duke kërcënuar, duke mallkuar, për të marrë peng një popull të tërë, të marrin peng zgjedhjet për të marrë peng të gjithë Shqipërinë.
Këto janë fjalë që burojnë nga e vërteta e kësaj situate. Ju kujtohet shumë mirë se dy vite më parë bënë pothuajse të njëjtën gjë. Askush nuk do të shpëtojë nëse pengon zgjedhjet, do të përballet me ligjin.
Nuk ka të gjatë e të shkurtër, të fortë dhe të dobët. Njësoj si këdo tjetër që shkel ligjin. Në këto kushte e kuptoni shumë mirë se Berisha, Meta,Basha dhe Monika janë në kundërshtim më interesat e këtij vendi. Kërkojnë me çdo kusht të djegin zgjedhjet. Ne do të bëjmë këto zgjedhje se do të zbrapsim kundërshtarët e zgjedhjeve”, tha Rama.
