Një punonjës i Aeroportit të Rinasit është arrestuar nga policia pasi dyshohet si përfshirë në grabitjen e 4.6 milionë eurove. Grupi hetimor dyshon se punonjësi ka njoftuar Admir Muratajn për futjen e blindave me para brenda aeroportit. Bëhet fjalë për Hasan Kanaçin, punonjës i Cargos në Rinas.
Hasan Kanaçi punonte në zonën e përpunimit të mallarave e parave dhe kishte dijeni për futjen e blindave me para në Rinas. Dyshohet se ai ka patur lidhje me grupin e Admir Muratajt e Klement Çalën, ku kanë bashkëpunuar për të kryer grabitjen.
“Nga Sektori për Krime të Rënda në Drejtorinë Vendore të Policisë Tiranë në bashkëpunim me Prokurorinë pranë Gjykatës Shkallës Parë për Krime të Rënda, në bazë të veprimeve hetimore të kryera, informacioneve të marra në rruge operative si dhe provave të siguruara gjatë hetimit, është bërë i mundur zbulimi, dokumentimi dhe ndalimi një tjetri autor të dyshuar të kësaj ngjarje kriminale e konkretisht i shtetasit: H.K., 48 vjeç, lindur dhe banues në Tiranë. Jane sekuestruar në cilesinë e provës materiale një sasi e konsiderueshme vlerë monetare në valutë dhe në lekë, njoftoi policia. Materialet proceduriale i kaluan Prokurorisë Pranë Gjykatës Shkallës Parë për Krime të Rënda Tiranë për veprat penale ‘Vjedhje me armë kryer në bashkëpunim’, ‘Grupi i strukturuar kriminal’, ‘Prodhim dhe mbajtje pa leje e armëve të ftohta’, ‘Mbajtje pa leje e armëve, armëve shpërthyese dhe municioneve luftarake’, ‘Vrasje e punonjësve të Policisë së Shtetit e kryer në bashkëpunim e mbetur në tentativë'”, njoftoi policia.
Një ditë më parë, Gjykata e Krimeve të Rënda rrëzoi kërkesat e 5 të arrestuarve të grabitje së 9 Prillit në Aeroportin e Rinasit për t’u përballur me bashkëpunëtorin e drejtësisë Alkond Bengasi. /BN/
Supergrabitja në Rinas/ Të arrestuarit kërkojnë ballafaqim me të penduarin kyç. Gjykata kundër
