Kryeministri Rama dhe kreu i bashkisë Erion Veliaj, kanë dalë sërish sot në mëngjes në takim me banorët e Tiranës. Duke u ndalur tek njësia 11, Rama ka mbledhur sërish disa qytetarë dhe është ulur për të pirë kafen e mëngjesit.
Gjatë bisedës kryeministri Rama dhe Veliaj është kujdesur që të komentojnë zhvillimet politike duke sulmuar opozitën për farsën që sipas tyre kanë krijuar më kot.
“Luli gaboi rëndë. E vetmja gjë me mënd që ka bërë ai si lider është marrëveshja e 17 majit. Vetëm atë…çdo gjë tjetër e ka kot. Dhe pretendimi se paskem blerë zgjedhjet bie poshtë. Tani të rrimë shtrëmber të flasim drejtë; në 2013 ne ishim në opozitë dhe mundëm Saliun, pushtetin e tij dhe një ekip me emra si Topalli, Bregu, Ruçi, i shkreti Olldashi e shumë të tjerë. E këto jëne emra me tjetër stekë, tjetër standart. Tani sipas këtyre ne Saliun e mundëm kurse Lulit ia paskemi bërë me hile! O zot!,” u shpreh Rama me banorët.
Ndërkohë, ajo bie më shumë në sy është fakti se si kreu i bashkisë Erion Velaj përsërit gjatë gjithë kohës fjalët e kryeministrit sikur i flet një sufler në vesh. Ndërkohë, Rama duket gjithnjë e më rehat në rolin e ri të ‘bujtësit’ duke pirë çdo mëngjes kafen me qytetarët e Tiranës. Thashetheme e muhabete ku mungon vetëm filxhani i fallit, gjë kohët e fundit edhe pse me ironi Rama ka filluar ta përdorë shumë.
