Vite më parë në Berat u shfaq një socialiste që bërtiste “as drita as ujë s’duam, vetëm PS të jetë e bashkuar”. Në atë kohë sapo kishin nisur përplasjet në rradhët e socialistëve, gjë që dukej se kishte shqetësuar militantët e kësaj partie.
Sot pak a shumë u përsërit e njëjta skenë, kun ë Patos u shfaq një socialiste, që pasi mori mikrofonin gjatë një takimi të Edi Ramës në kuadër të prezantimit të kandidatëve të Rilindjes, tha se askush nuk mund t’a ndante nga kjo parti.
Gruaja me emrin Shpresa, e cila jeton në SHBA, është ftuar nga vetë Rama për të folur.
Rama tha se e mbante mend gruan në çdo fushatë të PS-së dhe duket se Shpresa ka udhëtuar sërisht nga SHBA drejt Shqipërisë për të mos munguar në fushatën e rradhës.
“Kur hyra këtu dhe u ula, pashë një fytyrë shumë të dashur që e mbaj mend sa herë kam ardhur për fushatë në këtë zonë. E ftoj Shpresën këtu”, tha Rama, duke i dorëzuar mikrofonin të moshuarës.
“Jo Amerika që s’më ndan dot nga ju, po as dheu nuk më ndan. Nga Amerika shikoj çdo ditë TV shqiptar, ngrihem në 2 të natës dhe shikoj mitingjet e PD-së, që janë të groposura. Fitore, fitore me Edi Ramën”, bërtiste Shpresa, ndërsa Rama qeshte me show e rradhës.
