Arrestohet kryeplaku i fshatit Penkovë në Vlorë bashkë me të birin, pasi iu gjetën të kultivuara bimë narkotike përreth banesës së tyre.
“Shërbimet e Stacionit Policor Selenicë në bashkëpunim me Seksionin e Narkotikëve, në bazë të informacioneve të siguruara në rrugë operative, pas kontrollit të ushtruar përreth një banese në fshatin Penkovë, Bashkia Selenicë, u konstatun të mbjella bimë dhe fidanë të dyshuara të llojit kanabis sativa”, bënë me dije burime zyrtare nga policia.
Pas kësaj, Policia ka arrestuar pronarët e banesës si autorë të dyshuar në lidhje me kultivimin e tyre. Në pranga u vu A.N., 57 vjeç, me detyrë Kryeplak i Fshatit Penkovë dhe i biri V.N., 23 vjeç, banues në të njëjtën banesë.
Materialet iu referuan Prokurorisë për veprën penale “Kultivimi i bimëve narkotike” e kryer në bashkëpunim dhe “Shpërdorimi i detyrës”, shtuan të njëjtat burime.
