Sundimi i ligjit duhet të respektohet. Është ky reagimi i Departamentit amerikan të Shtetit lidhur me situatën politike në Shqipëri, ndërsa Presidenti Ilir Meta ka anulluar zhvillimin e zgjedhjeve lokale më 30 qershor, me një dekret që ka hyrë në fuqi duke u botuar në Fletoren Zyrtare.
Në një reagim për Vizion Plus, DASH u ka bërë thirrje palëve politike që të rinisin dialogun dhe të punojnë për të ardhmen e vendit.
“Kemi parë raporte dhe mbetemi në komunikim me aktorët relevantë për implikimet ligjore të shpalljes. Ne do të vazhdojmë të monitorojmë dhe vlerësojmë situatën ashtu siç zhvillohet. Është me rëndësi që sundimi i ligjit të respektohet.
Lidhur me situatën politike, pozicioni ynë mbetet i njëjtë. Ne i bëjmë thirrje të gjitha palëve për të shmangur konfrontimin dhe për të punuar së bashku në mënyrë konstruktive për të ardhmen e Shqipërisë.
Partitë e opozitës duhet të kërkojnë një rrugë drejt dialogut me qeverinë lidhur me reformën zgjedhore”, thuhet në reagimin e DASH.
