Personi që shihni foton me poshte është shtetasi kinez, i shpallur në kërkim ndërkombëtar nga Interpol Pekini si pjesë e një grupi kriminal mafioz atje, që u arrestua dje në Aeroportin e Rinasit, në Tiranë.
Sapo ka zbritur nga avioni që vinte nga Turqia, ku kishte bërë transitin, shtetasi i huaj është vënë në pranga nga Policia Kufitare e Rinasit, në bashkëpunim me Interpol Tiranën dhe Interpol Pekinin
I arrestuari është 25-vjeçari Guanghui Lai, i cili prej datës 23 prill të këtij viti ishte shpallur në kërkim ndërkombëtar për gjobëvënie, që sipas ligjit kinez parashikohet maksimumi i dënimit deri në 10 vite burg.
Para se të mbërrinte në Shqipëri, ai ishte nisur nga Hong Kongu, duke marrë avionin në Stamboll dhe më pas ka mbërritur në Tiranë. Nuk dihet ende nëse Shqipëria ishte destinacioni i tij përfundimtar, apo do të udhëtonte drejt ndonjë shteti tjetër.
Ashtu sikurse nuk është mësuar ende nëse atë e priste dikush në Tiranë apo jo dhe se ku do të qëndronte. Policia tha dje zyrtarisht se arrestimi i tij është kryer me qëllim ekstradimi drejt Kinës.
I ARRESTUARI
Në njoftimin zyrtar për arrestimin e shtetasit kinez Guanghui Lai, 25 vjeç, lindur në Kinë, i shpallur në kërkim ndërkombëtar më datë 23.04.2019, për veprën penale “Gjobëvënie”, Policia e Shtetit bëri dhe një përmbledhje të ngjarjes për të cilën ai akuzohet. Sipas Policisë, Zyra e Sigurisë Publike në Bashkinë Goazhou, në Kinë, ka zhvilluar hetime ndaj një grupi kriminal të tipit mafioz, të cilët merrnin përfitime ekonomike nëpërmjet dhënies me kamatë, hapjes së kazinove, kumarit dhe marrjes me dhunë të borxheve.
I arrestuari Guanghui Lai, sipas Policisë është një prej anëtarëve kryesorë të këtij grupi. Në vitin 2013, ky shtetas, së bashku me pjesëtarë të tjerë të grupit, kanë rrëmbyer shtetasin me iniciale X.L., duke e detyruar atë të ripaguajë një borxh në vlerën e 3.8 milionë yuan kinezë.
Në vitin 2014, në të njëjtën mënyrë, 25-vjeçari ka detyruar shtetasin me iniciale W.H., që të paguajë një hua duke e detyruar atë të shesë 23 suita, 40 vendparkime dhe 6 automjete me çmim shumë të ulët. “Si rezultat i bashkëpunimit mes Interpol Tiranës dhe Interpol Pekinit u bë i mundur arrestimi i shtetasit të mësipërm, me qëllim ekstradimin e tij drejt Kinës”, tha dje zyrtarisht Policia e Shtetit.
