Kreu i Partisë Demokracia-Sociale, Paskal Milo, i ftuar në emisionin Top Talk ka folur në lidhje me marrëdhënien e vështirë me Edi Ramën.
Sipas Milos, Kryeministri nuk dëgjon këshilla prej askujt.
“Kam konstatuar se Edi Rama nuk ka vesh për të dëgjuar. Dhe kështu ka qenë gjithmonë. Kam 15 vjet që e njoh në punë e sipër dhe kam një përvojë të gjatë”, tha Milo.
Në vijim ai shprehet se ndërkombëtarët kanë dashur që ngjarjet në Shqipëri, mbështetur edhe nga përvoja e hidhur e së kaluarës, të mos japin shanse të përsëritjes së krizave të thella politike dhe sociale.
“Nuk besoj se ndërkombëtarët do të rrinë duarkryq. Deri më tani ata kanë dërguar mesazhe të tilla për gjetjen e konsensusit.
Dje kam takuar Palmerin në Prishtinë dhe bisedova me atë për disa minuta. I shpreha shqetësimin për rolin që duhet të luajnë SHBA për zgjidhjen e krizës në Shqipëri. I fola për dekretin e Presidentit. Ai pranoi që është thjeshtë një dekret por nuk është zgjidhje, ashtu sikurse palët duhet të ulen vetë.
Po rrinë e po shikojnë pozicione të ngurtësuara. Ata deri më tani do të jenë monitorues të situatës deri në fund të javës dhe jo vetëm ata, por edhe vendet anëtare të Bashkimit Europian. Nga java tjetër do fillojnë që të rrahin fort sinjalet e alarmit. Ky është një dështim për politikën shqiptare”, tha Milo.
Një ditë më parë Milo ishte ndër drejtuesit e partive që zhvilloi takime me Presidentin Ilir Meta, në konsultimet që ky i fundit ka nisur me aktorët politikë në vend për caktimin e një date të re për mbajtjen e zgjedhjeve, pasi çdekretoi 30 qershorin.
