Ministri për Diasporën, Pandeli majko, u shpreh sot se është fans i Erjon Veliajt, kryetar i Bashkisë së Tiranës.
Majko ka zgjedhur festimet për 28 vjetorin e themelimit të PS-së për të folur me admirim për kryebashkiakun e Tiranës.
Majko ka preferuar të veçojë Veliajn, ndërsa ka lënë në hije kryeministrin Edi Rama.
Veliaj nuk ka nevojë për fushatë në këto zgjedhje, pasi fushata e tij është ndryshimi që ka pësuar kryeqyteti gjatë katër viteve të punës së tij, tha Majko.
“Jemi mbledhur të gjithë bashkë dhe brohorasim për PS-në, për këtë familje të madhe, e cila si në ditë të mira apo të vështira, se pse e tillë ka qenë historia jonë, rrëzohu ngrihu sepse socialistët asnjëherë nuk kanë humbur. Kjo është historia e PS-së, asnjëherë nuk kemi braktisur njerëzit tanë, votimet, fatin e Shqipërisë.
Kam këtu edhe fansat më të fundit të Erion Veliajt, kryetarit të Bashkisë, i cili këtë radhë nuk ka nevojë të bëjë fushatë sepse fushata është ndryshimi i Tiranës, është standardi më i mirë që ne socialistët ofrojmë për Shqipërinë, ndryshim, shpresë e një të ardhme më të mirë se e sotmja.
Historia na kërkon më shumë ne socialistëve sidomos sot. Shoh flamujt e PS, shoh flamujt tanë kombëtarë, e vërteta është se sot më shumë se kurrë Shqipëria duhet të jetë e para, për Shqipërinë, Tiranën që duam, PS-në që do udhëheqë këtë proces. Edhe unë jam fans i Erion Veliajt”, tha Majko.
