Deputeti i ardhur në parlament nga listat e LSI dhe Ilir Metës që asokohe drejtonte këtë parti, Ralf Gjoni, duket se nuk e ka të lehtë votën kundër njeriut ndaj të cilit shërbeu për disa vite.
Në një prononcim për mediat, Gjoni që nuk kursen as mediat dhe ata që mendojnë ndryshe nga ai, të cilët i quan shpifës dhe provincial, thotë se nuk do të votonte kundër Metës, por vota e tij kushtëzohet nga kërkesa për ndryshimin e sistemit zgjedhor.
Reagimi i plotë:
Përsëri për të gjithë shpifësit inflacionistë e injorantët që keqinterpretojnë në tellallin mediatik: E thashë hapur dje se nuk ka, dhe nuk do të ketë akt parlamentar për shkarkimin e Presidentit të Republikës.
Parlamenti nuk është Gjykatë Kushtetuese, dhe në mungesë të saj shkarkimi i Presidentit është i pamundur. E kam shprehur QARTË që ditën e parë që hyra në Kuvend se shkarkimin e Ilir Metës nuk do e votoja kurrë në kushtet aktuale.
E përsëris se vota ime në çdo akt parlamentar mbetet e kushtëzuar me ndryshimin e sistemit zgjedhor dhe korrigjimin e masakrës elektorale te vitit 2008! Kjo është arsyeja madhore për të cilën kam pranuar mandatin. Për më tepër, do shprehem të enjten në seancë plenare!
