Një ditë pasi Presidenti Ilir Meta deklaroi anullimin e zhvillimit të zgjedhjeve lokale më 30 qershor, ka ardhur edhe reagimi i parë ndërkombëtar në mbështetje të zgjidhjes së ofruar nga Kreu i Shtetit.
Reagimi ka ardhur nga Gjermania, përmes të cilës disa ditë më parë u deklarua se ishte e gatshme të lunate rolin e ndërmjetësimit mes palëve për zgjidhjen e krizës politike në Shqipëri.
Nënkryetari i grupit parlamentar të Unionit CDU/CSU në Bundestag, Johann Ëadephul shprehet se ekziston një situatë e re politike në Shqipëri.
Ai apelon që partitë të pranojnë vendimin e Presidentit, dhe të kërkojnë rrugët e pajtimit.
“Pas këtij vendimi të presidentit, ekziston një situatë e re politike. Të gjitha palët tani duhet të kërkojnë rrugën e pajtimit. Këtu përfshihen zgjedhje lokale demokratike me disa kandidatë të mundshëm. Kjo presupozon që të gjithë ta pranojnë vendimin e presidentit dhe pastaj të marrin pjesë në garën politike. Çdo gjë tjetër do të ishte jo evropiane dhe do t’i forconte në mënyrë të panevojshme dyshimet mbi dobinë e një procesit të aderimit. Kështu do të krijohej një bazë e re për një bashkëjetesë paqësore mes konkurrentëve politikë.
Në Evropë, çdo qeveri duhet të pranojë një opozitë kritike, dhe çdo opozitë duhet të pranojë një qeveri efektive. Kjo është një bazë qenësore për një shtet të qëndrueshëm dhe demokratik. Nëse Shqipëria dëshiron të përshkojë këtë rrugë drejt Evropës, sigurisht që do të marrë çdo mbështetje nga Gjermania”, thuhet në deklaratë.
