Vangjush Dako, kryebashkiak i Durrësit, prej disa ditësh është në qendër të vëmendjes për shkak të përgjimeve të publikuara nga e përditshmja gjermane “Bild”, gazeta më e madhe në Europë, kun ë një nga materialet ai flet në telefon me Astrit Avdylajn. Përgjimet janë pjesë e dosjes 339, për të cilën prokuroria e Krimeve të Rënda ka nisur hetimet për atë që quhet korrupsioni zgjedhor, apo i shit/blerjes së votave në qarkun e Durrësit.
Dako ka mohuar që në telefon të ketë folur me Astrit Avdylajn, ndërsa ka sfiduar për të gjetur se kush është personi që ka folur me të, duke përdorur numrin që ishte në përgjim.
“Ne nuk duam të humbim asnjë vote, ndaj ju kam hapur telefonin dhe ju kam thënë “po po, do e shohim”. Nuk jam as prokuror, as drejtues policie. Unë hap çdo telefonatë. Nuk e kam njohur kurrë Astrit Avdylin fizikisht deri në vitin 2016. Mbas këtij viti e kam njohur si shumë njerëz në atë qytet. E dija që ka qenë i dënuar. Nuk ka qenë pjesë e stafit elektoral, thjesht simpatizant i shpallur i PS. Nuk është anëtar organizate, por simpatizant i PS”, ka pohuar Dako.
Gjithsesi në përgjimet e publikuara rezulton se Avdylaj ka qenë shumë aktiv, duke komunikuar me drejtues të institucioneve lokale, madje në një telefonatë rezulton se ai ka dijeni edhe për lëvizjet e kryeministrit, takimet e këtij të fundit me Dakon dhe udhëtimin e tyre drejt Zvicrës.
E ndërsa strategjinë e mbrojtjes e ka bazuar pikërisht në atë se biseda e publikuar nuk ishte me Astrit Avdylajn, sot Dako është shfaqur në krah të ministres së Shëndetësisë, Ogerta Manastirliu, deputetes Klodiana Spahiu dhe kandidates së Rilindjes për bashkinë e Durrësit, Valbona Sako.
Gjithashtu kanë qenë edhe mjekë, që ndoshta të detyruar nga pjesëmarrja e ministres, kanë improvizuar sistemin shëndetësor në qytetin bregdetar.
