Nga Boldnews.al
Pas dy vitesh kanabizim të vendit, çunat u fuqizuan. Paraja e madhe në duart e tyre erdhi e beftë, por koha për të kthyer shpërblimin kishte mbërritur, është data 25 qershor 2017 dhe bota e errët e trafikut e dha verdiktin…! Rilindja u shpall fituese.
Një pjesë e mirë e elektoratit shqiptar besoi në “fjalimet” e kryeministrit, kur shprehej se në mandatin e parë nuk e lanë të tjerët që të qeveriste për të mirën e vendit. Sipas tij, partitë aleate të bashkqëverisjes 2013-2017, LSI dhe PDIU i kishin prishur imazhin vendit dhe ishin ata e keqja e korrupsionit që edhe në mandatin e parë lulëzoi dukshëm.
“Më ndihmoni dhe na ndihmoni që të kemi të vetëm timonin e qeverisjes”-shprehej Rama në çdo takim në fushatën elektorale. Shumë qytetarë ia dhanë votën me shpresën se vendi do ndryshonte, por aq nuk mjaftonte. Në lojë u fut bota e krimit që kishte superfuqi, para dhe pushtet. Bandat kriminale, veçanërisht trafikantët e drogës, të fortë fisesh dhe personazhe të lidhur me krimin, u kthyen në makinerinë e madhe që polli vota për Rilindjen.
Partia Socialiste mori 74 mandate deputetësh, çka u përkthye automatikisht në pushtet absolut të kryeministrit Edi Rama dhe shpikjes së tij konceptit Rilindje. Do qeveriste i vetëm, nën kontroll të plotë të çdo pushteti dhe me qëllimin e qartë për të rrëmbyer gjithçka që mbeti nga ndonjë institucion që ende vegjetonte në pavarësi.
Sot, dy vjet më pas…. Jemi praktikisht në autoritarizëm të theksuar. Opozita ka braktisur Parlamentin duke djegur mandatet, refuzon të marrë pjesë në zgjedhjet lokale me Ramën kryeministër, pasi u faktua të paktën nga dy dosje hetimore që elementë të rëndësishëm të botës së krimit, blenë vota për pushtetin që sot e ka në duar Rama.
Kjo pjesë nuk e shqetëson aspak kreun e qeverisë, që prej kohësh i ka ndarë qytetarët. “ne të mirët” dhe “ata që nuk e duan vendin”… Koncepte të denja me “armiqtë e pushtetit dhe partisë”, që në mos burgun, të paktën meritojnë “dënimin kolektiv”, për tu urryer nga pjesa tjetër e elitës së Rilindjes, që po shpikin njeriun e ri, si në kinën komuniste.
Fjala korrupsion për kryeministrin nuk është krim, por tregues së ata që e bëjnë janë “të zotë”, brilantët e partisë dhe qeverisë së tij. Konçensionet e rrugëve po kushtojnë miliona euro, në shifra të çmenduara, të cilat të vrasin vetëm kur i dëgjon. Për 17 kilometra rrugë fushore, qeveria jep 290 milionë euro për kompanitë e preferuara, të cilat vegjetojnë në botën haluçinative të Rilindjes dhe majmen çdo ditë me gjakun që del nga qytetarët që paguajnë taksa.
Drejtësia është tërësisht e rënë. Ajo që ka mbetur kontrollohet nga një dorë e vetme, kreu i qeverisë. Gjykata Kushtetuse nuk ekziston, Gjykata e Lartë ka rënë, Prokuroria e Përgjithshme dhe e Krimeve të Rënda është kthyer në zgjatim i zyrës kryeministrore.
Ministrat janë personazhe anonim që as kanë dëshirë, por as janë në gjendje profesionale dhe morale për të drejtuar institucionet që i kanë ngarkuar me pavarësi dhe paanshmëri. Thjesht janë kthyer në personazhe groteske, që gajasin kur është në mërzi kryeministrin tonë.
Krahas pluralizmit, qeveria vrau edhe ëndrrën shqiptare për të qenë pjesë e Bashkimit Europian. Vendit rrezikohen t’i kthehet regjimi i vizave. Hapjen e negociatave e shohim larg e më larg, ku janë shtuar shtetet demokratike të dotës që prerazi nuk mund të pranojnë në familjen e tyre një vend që më datë 1 korrik zyrtarisht do futet në monopartitizëm. Rilindja vrau pluralizmin, jemi kthyer si në pragun e viteve 90’, asokohe Rama ishte një piktor shëtitës që vraua “babanë politik” për ta rikthyer sistemin totalitar 29 vite pasi u fituan me shumë mund dhe kosto të madhe shoqërore.
