Detaje të reja bëhen me dije lidhur me operacionin e anti-kontrabandë, që ka çuar në pranga disa efektivë policie. Operacioni ishte një bashkëpunim me Prokurorisë pranë Gjykatës së Shkallës së Parë Tirane, SHCBA dhe Drejtorisë së Përgjithshme të Doganave. Në një konferëncë për mediat u zbardhën detaje nga operacioni.
Një nga prokuroret bëri me dije se bëhej fjalë për një skemë të futjes së makinave kontrabandë në Shqipëri. Nuk përjashtohet që mjetet të jenë përdorur në ngjarje kriminale, shtoi ajo.
Gjatë hetimit, në bashkëpunim me Drejtorinë e Doganave, janë kryer verifikimet ku ka rezultuar se vetëm ky shtetas, ka arritur të futet në territorin shqiptar me 54 automjete (relativisht të shtrenjta) për të cilat vetëm për 5 prej ka kryer zhdoganimet, për periudhën 2017–2019. Dyshohet përmes lidhjeve me punonjës në strukturat e Policisë Kufitare është kryer veprimtaria e kontrabandimit të mjeteve motorrike, kryesisht në Pikat Kufitare Qafë-Botë dhe Kapshticë.
Në konferencë u theksua se ndaj 4 efektivëve të policisë është vendosur dhe ekzekutuar masa e sigurimit paraprak të arrestit me burg.
Arben Grabovari figurë qendrore
“Dua të sqaroj që prokuroria e Tiranës duke marrë shkas nga autoritetet franceze dhe doganore shqiptare regjistroi procedimin për kontrabandë në ngarkim të Arben Grabovarit. Në Prill të 2019 ky person duke hyrë në Qafë Botë ka përdor një pasaportë si shtetas grek, po hetohet në arrest me burg. Gjatë hetimit rezultoi se nga 2017-2019 në prill ka hyrë 53 herë me mjete tokësore me makina të ndryshme me lejim të përkohshëm me shmangie të detyrimeve 4.5 mln lekë. Nga mjetet ka zhdoganuar vetëm 5 prej tyre. Makinat nuk janë zhdoganuar dhe janë hedhur në qarkullim duke krijuar mundësi për ti përdorur edhe për qëllime të tjera”, tha një nga prokuroret.
“Në 19 raste policët kufitarë nuk kanë pasqyruar numrin e shasisë duke i bërë të paidentifkueshme duke u shënuar vetëm autoveturë. Po hetohet për identifikimin pasi makinat mund të jenë përdorur në ngjarje kriminale. Arben Grabovari ka kryer zhdoganimet në pika të ndryshme, Kapshticë, Qafë Botë dhe Tre Urat. Policët kufitarë e kanë lejuar të kalojë pa kryer procedurën përkatëse. Po hetohet për shpërdorim detyrë 10 punonjës policie, 4 janë në burg nga Qafë Bota, ndërsa 6 të tjerë janë pezulluar nga Kapshtica dhe Tre Urat. Ka edhe punonjës të tjerë të përfshirë që po hetohen”, shtoi prokurorja Mirela Cano.
Policët e arrestuar
SHCBA njoftoi se në zbatim të vendimit të Gjykatës së Shkallës së Parë Tiranë, SHÇBA në 24 orët e fundit, në bashkëpunim dhe me Policinë e Shtetit, Sarandë dhe Korçë, të mbështetur dhe nga strukturat operacionale të SHÇBA-së, ekzekutuan 10 vendimet e Gjykatës.
Kështu arrestuar 4 punonjës policie, për veprën penale të “Shpërdorimit të detyrës”:
– Inspektor Sh.G., me detyrë kontrollor në P.K.K Qafë–Botë, Sarandë;
– Inspektor N.L., me detyrë kontrollor në P.K.K Qafë–Botë, Sarandë;
– Inspektor K.Ç., me detyrë kontrollor në P.K.K Qafë–Botë, Sarandë;
– Inspektor Th.Gj., me detyrë kontrollor në P.K.K Qafë–Botë, Sarandë.
Gjithashtu është caktuar dhe masa e sigurimit personal “Pezullim i ushtrimit të një detyre apo shërbimi publik” për veprën penale të “Shpërdorimit të detyrës”, për punonjësit e policisë:
– Inspektor A.P., me detyrë kontrollor në P.K.K Qafë-Botë, Sarandë;
– Inspektor A.H., me detyrë kontrollor në P.K.K Qafë–Botë, Sarandë;
– Inspektore E.Sh., me detyrë kontrollore në P.K.K Kapshticë, Korçë;
– Inspektore E.D., me detyrë kontrollore në P.K.K Kapshticë, Korçë;
– Inspektore F.M., me detyrë kontrollore në P.K.K Kapshticë, Korçë;
– Inspektore J.K., me detyrë kontrollore në P.K.K Kapshticë, Korçë.
Hetimet vazhdojnë në bashkëpunimin ndërinstitucional me Prokurorinë e Tiranës dhe Drejtorinë e Përgjithshme të Doganave.
/bn/
