Monika Kryemadhi mungoi në protestën e fundit të opozitës, ndërsa u sqarua se ajo kishte probleme shëndetësore. Fillimisht u tha se ndodhej jashtë vendit, më pas u përfol për operacione plastike, ndërsa vetë drejtuesja e LSI-së sqaroi se kishte kryer një operacion të suksesshëm për shëndetin e saj.
Kryemadhi ka sqaruar me një postim më 3 qershor “sot është dita e shtatë, pas një operacioni të vështirë që kam kryer. Ishte një ndërhyrje urgjente që duhej ta kryeja pas insistimit të mjekëve. Sot mora edhe konfirmimin e tyre që rreziku që kisha është tejkaluar, operacioni ka mbaruar me sukses”.
Pra me pak fjalë, Kryemadhi ka kryer operacionin mes 27 dhe 28 majit, data kur rezulton se Presidenti Ilir Meta, bashkëshorti i drejtueses së LSI-së, ka pasur disa aktivitete. Kështu më 26 maj, Meta ka qenë në Tropojë, ku është shfaqur duke kërcyer me rastin e aktivitetit “të Kcimit të Tropojës”.
Më 27 ka dhënë një intervistë në TV Dukagjini dhe nëse intervista ka qenë e drejtpërdrejtë, duket pak e çuditshme, veçanërisht për familjet shqiptare, indiferentizmi i treguar. Më 28 maj, Meta ndodhej në Tiranë po zhvillonte takime me një delegacion të stafeve drejtuese të Senatit dhe Kongresit të SHBA.
Ndoshta mund të mirkuptohet mungesa, qoftë edhe e Presidentit, në një moment të vështirë, kur mund të jetë në një vizitë zyrtare të një niveli të lartë, që s’mund të anulohet apo shtyhet.
Kryemadhi në sqarimin e saj thotë se “këtë problem mjekësor doja ta përballoja vetë, pa shqetësuar askënd tjetër. Doja, që kjo betejë e imja të mos interferonte aspak, në luftën që shqiptarët po zhvillojnë këto muaj për zgjedhje të lira dhe të ndershme”.
Dhe përtej faktit se drejtuesja e LSI-së ka zgjedhur ta përballojë vetë, mund të ngrihen shumë pikëpyetje, shumë keqinterpretime dhe shumë hamendësime. /Boldnews.al/
