Kryetari i Bashkisë së Shijakut, Ardian Kokomani, ka mohuar që të ketë takuar Astrit Avdylajn. Në një lidhje telefonike me emisionin “Opinion”.
Kokomani tha se ai që më mori në telefon është një qytetar i thjeshtë i Shijakut.
“Ai më tha mua për një takim, ku do të ishte edhe Vangjush Dako, si kryetar politik i Qarkut, por unë nuk kam shkuar”, tha Kokomani.
Ai tha se nuk ka pirë kafe absolutisht me Astrit Avdylin.
“Nuk e kam takuar, as kam pirë kafe. Ju mund t’a interpretoni si të doni. Unë s’kam qenë asnjëherë në takime me këto persona, në memorien time, nuk e mbaj mend që të kem takuar këto njerëz”, tha Kokomani.
Emri i Kokomanit doli nga përgjimet e publikuara sot nga Bild, ku ai telefonohet nga Astrit Avdyli, i cili e fton në një takim me Vangjush Dakon dhe deputetin Ilir Ndraçi.
“Po më ka marrë në telefon, por s’kam shkuar në asnjë takim. Unë i them kujdo për agjendën e takimeve ku jam, por s’kam qenë në takim.
Si qytetar i Shijakut komunikoj me çdo qytetar, pasi unë jam kryetar bashkie. Nuk jam takuar, ai ka bërë ftesën e vet, por unë se kam takuar.
Personat e tjerë janë njerëz të nderuar të zonës, janë kushërinj të deputetit.
Unë s’kam marrë asnjë kërcënim”, tha Kokomani.
Ai tha se njeh mbi 70 % të qytetarëve të Shijakut.
“E di që ka qenë i dënuar për hakmarrje. Nëse ju gjeni një njeri që të thotë se kam pirë një kafe, atëherë unë do mbaj përgjegjësi”, tha Kokomani.
