Analisti politik Andi Bushati duke folur në studion e “News 24” tha se zgjedhjet tashmë moralisht kanë rënë.
“Politika funksionon përmes kundërshtisë. Ti spikat se dikush të bën verejtje dhe ti di të përgjigjesh. Rama dhe të vetët e dinë që janë futur në një qerthull absurd. Sepse as para 30 vjetësh nuk mendohej një fushatë e tillë. Kur tha Ramiz Alia ne qeshnim, Rama ishte një nga ata që qeshi, nuk mund ta pranojë këtë pas 30 vitesh.
Po të shikosh vijësjelljen politike të Ramës këto 6 vjet ai nuk funksionon dot pa një armik. Pra nuk bën dot politikë pa thënë që fajin e ka Saliu, e ka ai apo jo. Ndaj në këtë fushatë i duhet të shpikë një armik”, tha Bushati.
Ndërsa lidhur me 30 qershorin, ai dha një këshillë për partitë e opozitës.
“Duhet të bëjnë punë bindëse që të ulet pjesmarrja në votime. Pra të dalë qartë se janë zgjedhje farsë”, shtoi ai.
Bushati argumenton se “demokracia nuk është baraz me zgjedhje sepse edhe Putin fiton me vota. Edhe Erdogani fiton me vota. Media, drejtësia duhet të funksionojnë në mënyrë të pavarur, ekonomia duhet të jetë e drejtë e ndershme. Nëse i heqim këto shtylla demokracisë, zgjedhjet kanë rënë. Këtu mungon kultura e ndëshkueshmërisë sidomos për blerësit e votave”.
