Sezoni i ri për Skënderbeun po nis mes shumë dilemash. Pasi kanë siguruar matematikisht zonën “Euro” (me fitimin e Kupës së Shqipërisë nga Kukësi, automatikisht kalon në vendin e 4-t), korçarët mbeten në pritje të lajmeve që do të vijnë nga KAS-i.
Me vendimin që do të merret brenda datës 21 qershor, në Korçë janë të “pushtuar” nga pasiguria dhe dilemat. E megjithatë, për të mos qenë të papërgatitur për të ardhmen, bardhekuqtë kanë filluar të punojnë në dy drejtime. Nëse gjithçka shkon sipas bindjeve të klubit dhe Gjykata e Arbitrazhit Sportiv konfirmon pafajësinë, atëherë duket se ndryshimet do të vijnë që nga stoli për Skënderbeun.
Korçarët kanë planifikuar që të rikthejnë Ilir Dajën si trajner dhe duket se vetëm KAS është pengesa për këtë bisedim. Por, nëse lajmet nga Lozana nuk do të jenë të mira, atëherë projekti do të vijojë me Orges Shehin në krye të pankinës. Përpos planeve që “thurin”, axhenda do të nisë me trajnerin aktual. Më 11 qershor është planifikuar që të nisë faza përgatitore dhe lojtarët do të vihen nën urdhrat e durrsakut.
Një gjë e tillë do të konfirmohet zyrtarisht, pra nëse Shehi do të jetë prijësi i Skënderbeut edhe pas fazës apo deri në daljen e vendimit të KAS. Fakt që mbetet të shihet brenda 21 qershorit.
RADAS
I pari që është kontaktuar nga klubi për të vijuar bashkëpunimin është kapiteni. Marko Radas, para se të nisej për në Kroaci, ka pasur një takim kokë me kokë me presidentin Ardjan Takaj. Madje, burime pranë klubit pohojnë se parimisht palët kanë arritur edhe një akord.
Gazeta “Panorama Sport” kontaktoi mbrojtësin, i cili nga Kroacia nuk e mohon një gjë të tillë. E megjithatë, thekson se vendimi i tij nuk varet nga KAS-i, por thjesht nga distanca. Ai qartëson se sapo të vijë në Shqipëri, do të vendosë për rinovimin.
“Unë jam kapiteni i ekipit dhe si i tillë jam njeriu i parë që mbështes projektin e ekipit. Nuk është e thënë që të pres vendimin e KAS. Sapo të shkoj në Shqipëri, do të takoj presidentin dhe do të vendosim rinovimin tim”, tha shkurtimisht Radas, duket shtuar se në grumbullim pritet të shkojë disa ditë pas datës zyrtare, pasi ka marrë leje nga klubi.
MUZAKA & CO
Pas kapitenit Radas, konfirmimet do të vijojnë me “senatorët” e tjerë të bardhekuqve. Gjergj Muzakës do t’i ofrohet shumë shpejt rinovimi dhe shanset janë të mëdha që mesfushori të jetë gati për të biseduar.
Në listë është edhe Krisi Vangjeli. Korçari dje gjatë mbrëmjes mbërriti në Melburn dhe sot pritet që të prezantohet me ekipin e ri. Por, kur dihet që kampionati atje mbaron në gusht, nuk përjashtohet mundësia e rikthimit nëse KAS jep lajmin e shumëpritur.
/Panorama Sport