Situata politike është anormale, ka një krizë, por është e stisur.
Kështu shprehet ministri i Sipërmarrjes dhe Biznesit, Eduart Shalsi, i ftuar në studion e lajmeve në RTV Ora.
“Situata është jo ajo që do donim të ishte. Dhe nuk do të ishim të vërtetë nëse nuk do ta pranonim që është një situatë anormale. Ka një krizë, por është një krizë e sistur. Nuk është një krizë reale”, tha Shalsi.
Lidhur me protestat e opozitës, Shalsi theksoi se nuk do t’ja lejoja kurrë vetes që të neglizhoja protestuesit, sepse ne kemi qenë pjesë e protestave të ashpëra 2009 – 2013.
“Kur po vija po shihja disa skena që nuk i kisha parë më parë dhe se si rriheshin njerëzit, nuk kisha parë rrahje ordinere dhe me kapuç të zinj që godisnin policinë”, theksoi Shalsi.
Sipas tij, opozita ka hyrë me vullnetin e saj në një rrugë pa krye, në një qorrsokak.
“Dhe të mos harrojmë po flasim për një opozitë në krye të së cilës janë disa personazhe, njëri prej të cilëve, lideri de facto i opozitës, ka në politikë prej 30 vjetësh.
Nëse mendoni se këta njerëz u provuan për 8 vjet se çfarë mund të bënin, mbetën shpresë apo mbrojtje për qytetarët e thjeshtë, prandaj themi krizë e sistur”, theksoi ai.