Arrestohet Ines Hajrrulla, i shpallur në kërkim në lidhje me ngjarjen e ndodhur më 10 Maj 2019 në Lungomare të Vlorës.
Sipas hetimeve, Hajrrulla ishte shënjestra e një atentati të ndodhur orëve të paradites. Ai ishte ulur në një lokal kur nga një makinë u qëllua në drejtim të tij me armë zjarri. Hajrrula u përgjigj po me zjarr. Një person i rastësishëm mbeti i plagosur nga të shtënat, ndërsa personat që qëlluan nga makina mbeten ende të lirë. Mjeti që dyshohet se u përdor në atentat u gjet i djegur në një fshat të Vlorës.
“Nga hetimet e kryera ka rezultuar se ky shtetas është kundërpërgjigjur me armë zjarri pistoletë në drejtim të automjetit ku ndodheshin personat e pa identifikuar që kanë hapur zjarr me armë në drejtim të lokalit ku ndodhej shtetasi Ines Hajrrulla. Në lidhje me ngjarjen mbeti i plagosur një 63-vjeçar, i cili ishte klient në një lokal tjetër me distancë prej 70 m larg. Gjykata i ka caktuar shtetasit Ines Hajrrulla, masën e sigurisë ‘Arrest në burg’ për veprat penale ‘Mbajtje pa leje të armëve luftarake dhe municioneve’ dhe ‘Vrasje kundër dy ose më shumë personave’ e mbetur në tentativë“, njoftoi këtë të martë Policia e Vlorës.
Kush është Inez Hajrullah – Ai dyshohet si pjesë e grupit kriminal të përfshirë në dosjen e zhdukjeve të bujshme në qytetin bregdetar. Hajrullah në vitin 2017 mbeti i plagosur rëndë si pasojë e një atentati me eksploziv në makinë.
Poshtë pjesës së përparme të makinës që drejtohej nga i riu ishte vendosur një sasi rreth 300- 500 gramësh tritol. Makina shpërtheu pasi mjeti kishte bërë vetëm pak metra pasi kishte dalë nga një lavazh. Lënda plasëse ishte e pajisur me fitil të lidhur me motorin e mjetin, i cili ka shërbyer edhe si ndezës. Shpërthimi ka qenë aq i fuqishëm sa mjeti ka ecur për inerci edhe rreth 70 metra të tjera dhe është përplasur me një makinë të dytë. Ngjarja u shënua paraditen e 27 nëntorit 2017 pranë godinës së Institutit të Sigurimeve Shoqërore në lagjen ”Hajro Çakërri”, tek Bishti i Kalldrëmi në një kohë kur në zonë kishte kalimtarë të shumtë të cilët kanë kaluar momente paniku. Sipas burimeve Hajrullahu humbi një këmbë për shkak të plagëve.
