Intervista e fundit e trajnerit Gega për “SuperSport” ishte konceptuar nëpërmjet mesazheve të gazetarëve të kësaj redaksie, por në grup kishte hyrë edhe Lorenc Trashi, që dy raste bëri pyetje me spec për 55-vjeçarin.
Ndërhyrja e parë e Trashit: “Profe, kujdes Koradon (përgatitësin atletik), mos e lër të bëjë ligjin dhe jo shumë vrap. Tregoji që je ti trajneri i parë”. Këtij komenti trajneri Gega iu përgjigj: “Po Trash, e di që e ke kaq merak Koradon, e di dhe merakun tënd për vrapin. Përveç lojës së mirë, ka qenë edhe ana fizike që na ka mbajtur në ritëm. Është kolegu im Korado që e mbështes dhe i lë të drejtat në stërvitje aq sa i takojnë. Për pjesët e tjera, rri i qetë Trash, se jam unë trajneri, secili e di pozicionin e vetë. Për pjesën e vrapit, mos ki frikë, pa vrap dhe dhimbje nuk ecni dot përpara. Ti ankohesh, por je i pari në vrap”.
Ndërhyrja e dytë erdhi kur u pyet për marrëdhëniet me drejtuesit, ku Gega tregoi se ku e pi kafen me drejtorin Rama. Pyetjes së Trashit, shko pak më shumë te lokali i presidentit, trajneri Gega iu përgjigj: “Trashi, unë kam edhe 1 vit kontratë me Partizanin. Bën mirë ti që të shkosh se ndoshta nuk do jesh në planet e mia. Batutë kjo. Unë shkoj në një kafe bashkë me drejtorin Rama, në mëngjes e konsumojmë bashkë. Flasim për ekipin, për problematikat. Kur kemi diçka më private, presidenti Gazi ka ambientin e tij dhe flasim”.
