Nga Tirana, sekretari i Përgjithshëm i NATO-s, Jens Stoltenberg bëri thirrje për bashkëpunim mes palëve politike në vend dhe shmangie të dhunës.
“KE miratoi hapjen e negociatave. Është e rëndësishme që ky proces të vijojë. NATO është aleancë e vendeve demokratike dhe në vende demokratike do ketë mendime të ndryshe, debate, por dhuna politike bie ndesh me vlerat tona demokratike. Është e papranueshme dhe u bëj thirrje të gjithë aktorëve politikë të sillen me vetëpërmbajtje dhe të angazhohen në dialog”, tha Stoltenberg në një deklaratë të përbashkët për mediat me kryeministrin Edi Rama.
“Respektoni institucionet dhe angazhohu në dialog politik. Zgjedhjet janë padyshim të rëndësishme, ndaj ju bëj thirrje aktorëve të marrin pjesë dhe të kontribuojnë në dialog dhe të zgjidhin mosmarrëveshjet përmes dialogut”, tha ai.
Stoltenberg shprehu ngushëllime për dy ushtarakët të cilët humbën jetën në një mision të NATO-s në Letoni.
Ndërkohë, kryeministri Edi Rama, nuk ngurroi të thumbonte opozitën. Shefi i qeverisë tha se, në 30 qershor do shkohet drejt zgjedhjeve, sipas tij demokratike, pasi opozita nuk është penguar të hyjë në zgjedhje, por ishte një vendim i marrë prej tyre. Rama u shpreh gjithashtu se opozita nuk ka mbështetje masive popullore. /BN/
