Një shqiptar ka humbur jetën në një aksident të ndodhur në Itali gjatë natës.
Siç raportojnë mediat lokale, nga ngjarja në periferi të Arezos në Itali, viktimë ka mbetur 35-vjeçari Shpëtim Halili, i cili po udhëtonte rreth orës 00:24 me motor.
Në kanalin buzë rrugës u gjet skuteri i shqiptarit ndërsa 30 metra më tej është gjetur trupi i 35-vjeçarit me plagë të rëndë në trup nga goditjet e makinës. Sipas mediave italiane, shqiptari edhe në fytyrë kishte shenja të mëdha që i janë krijuar pas rrëzimit nga motori i tij dhe përplasja nga makina që i ka kaluar sipër.
Mbetet ende e paqartë nëse shqiptari është rrëzuar fillimisht nga motori i tij apo është goditur nga ‘Fiati 500 L’ ngjyrë jeshile që drejtohej nga një grua e re. Gruaja në fjalë ka ndaluar menjëherë pas aksidentit dhe ka njoftuar autoritetet ndërkohë që u gjet pranë trupit të pajetë të shqiptari duke thirrur: ‘Nuk lëviz, është i vdekur’.
Edhe pse në ndihmë të 35-vjeçarit kanë ardhur mjekët e urgjencës të cilët i kanë bërë masazh kardiak nuk ka qenë e mundur që ti shpëtohet jeta.
Në dëshiminë e saj, gruaja që drejtonte Fiatin jeshil ka deklaruar se nuk kishte parë gjë vetëm kishte ndjerë që trupi i shqiptarit ishte futur poshtë rrotave të makinës.
